Sport.cw

Sponsored by

Sponsored by

Sponsored by

Cats a gana den inen èkstra

Wild Cats Guardian Group/KJ74 ayera, djaweps 31 di mei 2018, a hañ’é ta lucha duru den final pa asina dominá Groot Kwartier Stars Mangusa. E tim kampion di Kòrsou den di 10 inen a gana e enkuentro, ku a tuma lugá den Tio Daou Ballpark: 9-8.

Tabata parse ku Wild Cats tabata bai gana fasil di Groot Kwartier Stars, ora ku ela sali hinka 3 kareda den promé inen. E ekipo kampion despues di tres entrada tabata ganá 5-0.

E Streanan di Groot Kwartier sinembargo den nan di 7 turno na bate a eksplotá hinkando 7 kareda i bòltu e skor, despues ku parsialmente e picheo dje Pushinan Brabu a kai den otro. Den di 8 inen e kampion di Kòrsou ku 2 kareda a kòrta e desventaha te na 7-8 i a empatá e wega den di 9 entrada (8-8) pa finalmente den di 10 inen laga Groot Kwartier Stars den tereno: 9-8.

E enkuentro tabatin bon picheo den e promé parti di prinsipalmente Swenton Martina. E picher habridó di Wild Cats den 6 inen no a pèrmití kareda na Groot Kwartier. Den di 7 entrada ela pèrdè kòntròl riba su balanan i Groot Kwartier Stars a skor 5 kareda kontra dje.

Randolph Kirindongo, Ardley Jansen i Yurendell de Caster tabata e mihé bateadónan pa Wild Cats. Kirindongo a bati 3 hit den 6 turno i empuhá 3 kareda, Jansen tabatin 3 hit den 4 turno bou di kua 1 homerun i ela empuhá 2 kareda, miéntras ku De Caster tabata bon pa 1 hit den 4 turno ku tabata un homerun i ela empuhá 3 kareda.

Un nota remarkabel ayeranochi tabata, ku tabatin dos ekspulshon den e enkuentro. E kampionato ta kontinuá mañan djasabra ku e wega entre Sta Maria Pirates Chippie i Royal Scorpions Mr Baseball My Malls. Esaki ta kuminsá mitar di 8 den Stadion Johnny Vrutaal.

Translate »