Sport.cw

Sponsored by

Sponsored by

Sponsored by

Lucas a tira ’two hitter’

Picher Jordan Lucas tabatin un tremendo anochi ayera, djarason 30 di mei 2018, riba montíkulo pa Sta Rosa Indians. Ela pèrmití 2 hit só sin kareda na Fire Birds Citizen Insurance. Asina ela guia e Indjannan na un triunfo di 10-0.

E kampionato di beisbòl dòbel A, esta Liga Aqualectra, a kontinuá ayera den Stadion Johnny Vrutaal na Rif, Otrobanda.

Sta Rosa Indians for di promé inen a bai dilanti 1-0. Den e di sinku entrada e Indjannan a skor 5 kareda mas: 6-0. E tim a ampliá e ventaha den di sei i shete inen ku respektivamente 1 i 3 kareda: 10-0.

Miéntras ku e bateadónan di Sta Rosa tabata bati e pichernan di Fire Birds, picher Jordan Lucas tabata kasi perfekto riba montíkulo pa Indians. Den 7 inen ela pèrmití 2 hit so, miéntras ela poncha 4 bateadó i duna solamente 1 base por bola. Dje 79 lansamentunan ku ela hasi, 54 tabata straik.

Amir Daou a resultá e mihó bateadó pa Sta Rosa Indians. Ela dal 2 hit den 2 turno. Riorden Windster i Swindly Lint tambe a bati 2 hit, pero den 4 turno.

Pa Fire Birds Dradon Evelina i Jedion Cras a dal 1 hit den 2 turno. Tabata pues úniko 2 hitnan kontra picher ganadó Lucas. Picher pèrdèdó tabata Ludwin Obispo ku den 4 inen a pèrmití 6 kareda i 8 hit.

Translate »