E seri di weganan entre Liga Pariba i Liga Pabou den divishon Intermediate ta empatá 2-2. E dos selekshonnan a trit e públiko amante di beisbòl hubenil den wikènt tras di lomba riba algun bon akshon. Den e promé weganan aki Ryjeteri Merite a sobresalí ku 1 triunfo, miéntras ku ela bati 6 hit den 9 turno na bate.
Liga Pariba i Liga Pabou den Internediate ta hunga un seri di 12 wega kontra di otro. E promé 4 enkuentronan a tuma lugá den Sabana Ballpark.
Den e promé wega riba djabièrnè 5 di aprel, Liga Pariba a gana ku skor di 4-2 di Pabou. Picher ganadó tabata Aidan vab Kimmaenade, miéntras ku su kompañeronan di selekshon Nayerich Waterfort i Rajengelo Paulina a bati 1 hit den 1 turno. Charmayne Josefa a resultá picher pèrdèdó. Ryjeteri Merite tabatin 3 hit den 4 turno na bate, miéntras Jeremy Cova a kaba ku 1 hit den 1 turno.
Liga Pabou djasabra 6 di aprel a gana e dos enkuentronan riba e programa pa asina bai 2-1 dilanti den e seri. E selekshon a gana e promé wega ku skor di 5-2. Picher Ryjeteri Merite a gana e enkuentro, miéntras ku Jeanou Suares a dal 2 hit den 2 turno. Picher pèrdèdó tabata Charlie Zink i Fitzgerald Villanueva tabata mihó bateadó ku 3 hit den 3 turno.
Den e di dos wega djasabra Liga Pabou a dal Pariba ku skor di 5-3 i bai 2-1 ariba den e seri. Chelton Jones a resultá picher ganadó, miéntras ku Ryjeteri Merite i Shendrick Sambo a kaba ku 1 hit den 2 turno. Pa Liga Pariba picher Gyasi Isenia a sufri e derota. Qyshawn Legito a bati 2 hit den 3 turno i Dmitri Dijkhuiizen a terminá ku 1 hit den 1 turno.
Liga Pariba awe djadumingu a gana e di 4 wega pa asina empatá e seri na 2. E triunfo aki tabata danki na un ‘grandslam’ dje hungadó Charlie Zink. Picher ganadó a resultá Fitzgerald Villanueva, miéntras ku e mes tambe a destaká na bate ku 2 hit den 3 turno. Su kompañeronan Rajengelo Paulina tambe a sobresalí ku 2 hit den 2 turno. Pa Liga Pabou picher Jeremy Cova a pèrdè e wega. Nathaniel Lourens a bati 1 hit den 1 turno, miéntras ku Ryjeteri Merite a kaba ku 2 hit den 3 turno.