Willemstad Warriors a kuminsá e kampionato di basketbòl U20 brabu. E tim ayera, djabièrnè 5 di aprel 2019, a registrá su di dos viktoria derotando kampion Excel ku fasilidat: 67-40. Aytor Alberto tabata den gran forma saliendo ’topscorer’ ku 25 punto.

Curaçao Basketball Federation (Cubafe) a kontinuá ku e kompetensia den kategoria di 20 aña i mas hóben (U20) den sala Niels Liberia di Stadion Odulio Willems na Suffisant. Esaki a tuma lugá relashoná ku apertura dje torneo di futbòl Caribbean Club Shield di Concacaf na Sentro Deportivo Kòrsou (SDK) na Brievengat.

Despues ku Willemstad Warriors den su promé kompromiso a superá Sharks 46-36, ayera djabièrnè e tim a derotá e aktual kampion Excel di forma ku no a laga niun duda: 67-40.

Aytor Alberto atrobe a hunga un tremendo wega i a bolbe sali ’topscorer’ di su tim. Sí den e promé enkuentro ela skor 17 punto kontra di Sharks, ayera e hóben talentoso aki tabata bon pa 25 punto. Pues den dos wega su total ta 42 punto ku ta un promedio di 21 punto.

Julio Espinal a sobresali pa su tim Excel. Ela tèrminá ku 18 punto. Den su promé enkuentro e hóben aki a skor 28 punto i pues awor tin 46 punto den dos wega, ku ta bon pa un promedio di 23 punto.

Den e otro wega den kategoria U20 Royal Hoops a sorprendé supkampion Janwe Spartacus ku skor di 62-44. Esaki ta porsierto e di dos derota siguí pa Spartacus, despues ku e tim a gana su wega inougural.

Willem Felisia a sobresalí pa Royal Hoops. Ela kaba e enkuentro komo ’topscorer’ ku 24 punto. Davidson Elisabeth di Spartacus tambe a destaká: 20 punto.