Willemstad Warriors a gana su promé wega den e kampionato di basketbòl den divishon Senior, propinando Curaçao Vikings su promé derota: 58-56. Mas aleu Montaña Spartans tambe a logra su promé triunfo ayera, djaweps 4 di aprel 2019, ora ela gana ku skor di 86-73 di Seru Fortuna Brothers.
Curaçao Basketball Federation (Cubafe) a sigui ayera ku e kompetensia lokal den divishon Senior den sala Errol Rooi di Sentro Deportivo Kòrsou (SDK) na Brievengat.
Despues ku Curaçao Vikings a gana wikènt pasá su enkuentro inougural di Seru Fortuna Brothers 63-42, e tim ayera a sufri su promé derota. Willemstad Warriors a gana ku skor pèrtá di 58-56.
Enrico Corsen a resultá ’topscorer’ dje enkuentro ku 13 punto. Apesar di esaki e no por a evita e derota di su ekipo. Awor e tin 26 punto di skor den e dos weganan di su tim. Pa Warriors Reno Martha a kaba komo e hungadó ku mas punto: 10.
Den e di dos wega di ayeranochi djaweps Montaña Spartans a registrá su promé viktoria dje kampionato. E tim a superá Seru Fortuna Brothers ku skor di 86-73.
Yomil Ventura di Seru Fortuna Brothers tabata ’topscorer’ dje enkuentro ku 24 punto. Shurelton Hanley di Montaña Spartans tabatin un punto menos ku ne: 23 punto.
E kampionato di Cubafe ta sigui awenochi, djabièrnè 5 di aprel, ku dos wega den kategoria U20. Willemstad Warriors ta topa Excel, miéntras ku Janwe Spartacus ta hunga kontra di Royal Hoops. E weganan aki ta tuma lugá den sala Niels Liberia di Stadion Odulio Willems. Esaki ta relashoná ku e torneo di futbòl pa Caribbean Club Shield ku ta kuminsá awe den Stadion Ergilio Hato.
