E seri entre Liga Pariba i Liga Pabou den Intermediate League ta kayente i kanando pareu. Esaki ta empatá na 5 wega na banda. Tur dos liga a gana den wikènt tras di lomba, esta djasabra 21 i djadumingu 22 di aprel 2018, dos wega di otro.
Intermediate League ta kai bou dje organisashon di Curaçao Little League. Den e liga aki aktualmente ta hungando un seri di enkuentro pa formashon di selekshon entre Liga Pariba i Liga Pabou.
E seri a kuminsá ku Liga Pariba ganando e promé dos enkuentronan i pues bai dilanti 2-0. Liga Pabou despues a empatá e seri na 2-2 i for dje momento ei e timnan a keda gana i pèrdè di otro. Den wikènt tras di lomba Liga Pabou a gana dos wega djasabra pa despues pèrdè e dos enkuentronan riba djadumingu di Liga Pariba. Tur dos liga tin pues 5 triunfo i 5 derota.
Den e promé konfrontashon djasabra Liga Pabou a superá Liga Pariba ku skor di 10-2. Picher ganadó tabata Keorden Leito, miéntras ku Joshua Leito a dal 1 hit den 1 turno na bate. Picher Rodmar Angela a pèrdè i Shammy Maximiliana i Henrick Scorea tambe tabatin 1 hit den 1 turno.
Liga Pabou a gana e di dos enkuentro djasabra ku skor di 10-8 i asina bai 5-3 dilanti den e seri. Picher ganadó a resultá Joshua Leito, miéntras ku Keorden Leito tabata bon pa 1 hit den 3 turno na bate. Pa Liga Pariba a pèrdè e wega picher Welton Lourens i Justin Dambruck tabata e mihó bateadó ku 2 hit den 2 turno.
Djadumingu Liga Pariba a logra kòrtá e ventaha di Liga Pabou, ganando ku skor di 13-11. Shammy Maximiliana a resultá e picher ganadó, miéntras ku Wilmer Bazur tabatin un mainta perfekto na bate ku 3 hit den 3 turno. E derota tabata pa picher Mairoshendrick Martinus i Pe-son Revierre a dal 2 hit den 2 turno na bate.
Finalmente Liga Pariba a empatá e seri na 5 wega pa banda, ora e selekshon aki a gana djadumingu atardi ku skor di 8-6 di Pabou. D’sean Wederfoort a resultá picher ganadó i Tyree Valerian a sali mihó bateadó ku 2 hit den 2 turno. Picher pèrdèdó tabata Greggson Juliana i Joao Carlos Serrao Batista a kaba ku 1 hit den 1 turno na bate.
