E organisashon Watakeli a konkistá su di dos titulo kampionil. Despues ku e tim djadumingu a prolongá su reinado den klase superior maskulino, ayera -djaluna 23 di aprel 2018, e sukursal den klase A a sigui e bon ehèmpel.
Federashon Vòlibòl Kòrsou (FeVoKo) ayera a kontinuá ku e serinan final den klase A maskulino i femenino. Meskos ku den klase superior, den A tambe ta hunga seri mihó di sinku wega.
Tantu e bueltanan preliminar komo e ‘play-off’ i final den klase A a keda efektuá den sala kubrí Errol Rooi di Sentro Deportivo Kòrsou (SDK) na Brievengat.
Den klase maskulino A Watakeli a gana e promé dos weganan den final, pero ayera tabata parse dado momento ku Green Tigers tabata bai kòrta e ventaha ora e tabata falta un sèt (2-1) pa gana e wega. Final di kuenta Watakeli a bòns bèk i gana dos sèt siguí i titulá kampion.
Watakeli a sali gana e promé sèt ku 25-19. Green Tigers a mantené e animo haltu i den a bringa duru ganando e di dos sèt ku 25-21. Ku mesun determinashon e Tigernan Bèrdè despues di otro lucha tenás a gana e di tres sèt ku 30-28 i asina bai dilanti 2-1.
Green Tigers pues tabating ku gana un sèt mas pa asina fòrsá un di 4 wega den final klase A. Watakeli sinembargo tampoko a entregá i a empatá e wega na 2, ganando e di kuater sèt: 25-20. Asina e timnan a pasa pa hunga e di sinku sèt, ku Watakeli a gana ku skor di 15-8 i pa konkistá e titulo i asina sigurá e di dos kampionato pa e organisashon aki.
E vòlibolistanan ku a sobresalí ayeranochi den sala kubrí Errol Rooi di SDK tabata Marlison Kleinmoedig i Cyrus Brands. Tur dos ta dje tim kampion Watakeli.
Den klase A femenino Shuatanari a gana e di tres wega di final i asina bai 2-1 dilanti. E tim a gana Stakamahakchi ku skor di 3-0, aunke ku e wega tabata hopi bringá. E parsialnan tabata 25-16, 25-24 i 25-23. E vòlibolista Wenchi Hart a sobresalí pa Shuatanari.