Ku un triunfo konvinsente di 3-0 riba Green Jewels, Shuatanari a subi bai para na di dos lugá huntu ku Hurricane den divishon máksimo femenino di Federashon Vòlibòl Kòrsou (Fevoko). Den klase maskulino Stakamahakchi a mantené su posishon na di dos lugá ganando ayera, djadumingu 13 di yanüari 2019, di Titus: 3-1
E kampionato ku ta dediká na Dito Ravenstein, a kontinuá ayeranochi ku kuater wega den sala Errol Rooi di Sentro Deportivo Kòrsou (SDK) na Brievengat.
Den divishon máksimo femenino Shuatanari no tabatin hopi problema ku Green Jewels. Prinsipalmente den e promé sèt Green Jewels a duna bon bataya pero tòg a pèrdè esaki: 16-25. E di dos i tres sèt Shuatanari a gana ku relativo fasilidat: 25-7 i 25-8. Esaki ta e di tres triunfo kontra dos derota pa Shuatanari.
Den e di dos enkuentro den divishon máksimo femenino Watakeli a sorprendé Hurricane ganando e promé dos sètnan: 25-18 i 26-24. Hurricane no a entregá pero a gana sèt 3 i 4 ku respektivamente 25-15 i 25-8 pa empatá e skor na 2-2. Watakeli sinembargo den e di sinku tabatin e mihó wega i a gana esaki ku 15-11 pa asina tòg bai kas ku e viktoria: 3-2.
E triunfo ta e di dos pa Watakeli kontra tres derota, miéntras ku Hurricane a sufri su dos derota i a keda ku tres viktoria. Awor pues Hurricane i Shuatanari ta empatá na e di dos lugá. Stakamahakchi ta komandá e tabla di posishon ku sinku viktoria sin derota.
Den divishon máksimo maskulino Stakamahakchi a superá Titus den un tremendo bataya: 3-1. E parsialnan ta indiká kon duru e timnan a bringa kontra di otro: 25019, 16-25, 33-31 i 25-15. Awor Stakamahakchi tin 4 viktoria i 1 derota i ta sigui okupá e di dos lugá, miéntras ku Titus a sufri su di 4 derota i a gana te ainda un wega só i ta empatá ku Green Tigers na ultimo puesto.
Den klase A maskulino tambe tabatin un wega. Esaki a bai entre Watakeli i Green Tigers. Despues di a pèrdè e promé sèt ku skor di 23-25, Watakeli a rekuperá i gana e sigiuente dos sètnan ku 25-11 i 25-10.
E kampionato di vòlibòl ta kontinuá awenochi, djaluna 14 di yanüari, ku dos enkuentro den klase A. Den kategoria femenino Stakamahakchi ta hunga kontra di Xaverianen i den maskulino esaki lo ta Titus kontra Warwarú.