Federashon Deporte I Olímpiko (FDOK) a ranka sali awe djadumingu 24 di yüli 2022 ku su evento titulá siman olímpiko. E apertura tabata 1or di tra’i mèrdia na Sam Buntin Ballpark den Brievengat. E promé aktividat deportivo tabata un wega di sòfbòl den e parke aki.
FDOK a hinka un siman deportivo ekstenso den otro. Durante un siman tin diferente enkuentro deportivo. Resientemente e organisashon a tene un rueda di prensa pa duna informashon tokante e siman aki.
Tin diferente enkuentro deportivo den Sam Buntin Ballpark, Sentro Deportivo Kòrsou (SDK), Stadion Odulio Willems, Sala Rekreo Irene Moreno i sala di FDOK. Esakinan ta konsistí di weganan di sòfbòl, futbòl, futsal, vòlibòl, basketbòl i tènis di mesa. Tambe tin natashon, sailing, biyar, karate, yudo i taekwondo i deporte di dam.
Awe djadumingu tabatin pues sòfbòl na Sam Buntin Ballpark. wega di dam den sala di FDOK i basketbòl den sala Errol Rooi di SDK. Mañan djaluna 25 di yüli tin vòlibòl den sala Errol Rooi di SDK. Esaki ta entre 8or pa mitar di 10 di anochi i djamars 26 di yüli entre mitar di 8 pa mitar di 11 tin weganan di futsal den sala Errol Rooi di SDK.
