E kampionato nobo di futbòl den promé divishon, esta Liga MCB, a sigui ku vários enkuentro den Stadion Antione Maduro na Kintjan. Den e di dos serie di weganan, Skèrpènè i Centro Social Deportivo Barber a logra nan di dos viktoria den dos enkuentro i pues ta komandá e tabla di posishon ku 6 punto.
Federashon Futbòl di Kòrsou (FFK) a tuma e desishon pa reprogramá weganan dje promé buelta. Tur enkuentro ku tabata planiá pa hunga den Stadion Ergilio Hato e wikènt aki, a muda pa e stadion na Kintjan.
Centro Social Deportivo Barber ku den su promé kompromiso wikènt pasá a gana ku skor di 3-0 di Vriendschap Eendracht Sterken Tegen Alles (VESTA), djabièrnè a superá e kampion di Kòrsou Jong Holland ku skor di 3-1.
Na di 19 minüt Gunnarson Schoop a pone e tim di Bándabou dilanti: 1-0. Ruensley Leuteria tres minüt despues a empatá e wega: 1-1. Jurensly Martina na di 32 minüt via di un pinalti a pone Barber dilanti atrobe (2-1) pa despues di 5 minüt e hinka e di tres gol pa su tim: 3-1.
Despues ku Skèrpènè a derotá Jong Colombia djarason ku 2-1, ayera djasabra e tim a gana VESTA ku skor amplio: 4-0. Tur e golnan tabata den di dos tempu. Jimbertson Vapor na di 48 minüt a pone e tim di fraternan dilanti i 1 minüt despues Christopher Isenia a hasi e skor 2-0. Na di 52 minüt Benjamin Gil Guedez a hinka e di tres gol, miéntras ku Vapor na di 72 minüt a bolbe skor: 4-0. Awor Vapor tin 3 gol ya ku kontra di Jong Colombia tambe ela skor un Biaha.
Riba mesun djasabra Union Deportivo Bandabou (Undeba) a gana su promé wega superando Jong Colombia ku skor di 4-1. Shairyson Albertus a habri e markadó na di 7 minüt p’e tim di Bandabou. Na di 32 minüt e wega ta empatá na 1 via di un outogol di Jansen i a bai sosegá asina.
Den di dos tempu Undeba a skor tres biaha. Na di 67 minüt Adriaan Lourens ta hasi e wega 2-1. Norvianel Naar na di 87 minüt hasi e wega 3-1 pa finalmente e mes bolbe skor na di 90 minüt: 4-1.
Awe djadumingu CVV Willemstad i Centro Dominguito a parti punto: 1-1. Na di 38 minüt Vylison Lake a skor p’e tim di Kintjan, miéntras ku Ashar Bernardus ta bolbe mustra su balor pa su ekipo, hinkando su di dos gol den e kampionato. Ela hasi esaki na di 85 minüt.
Finalmente Victory Boys den e último wega awe djadumingu a gana ku skor di 2-1 di Sport Unie Brion Trappers (SUBT). Na di 18 minüt Gedion Martina a pone e tim di pariba dilanti: 1-0. Jamian de Kaster na di 61 minüt a dòbel e skor pa Victory Boys. Den un último akshon Edgard Gassiani a salba honor na di 90 minüt pa e tim di Kintjan: 1-2.