E kampionato nobo di vòlibòl a sigui ayera, djadumingu 25 di novèmber 2018, ku vários enkuentro. Den klase femenino superior Shuatanari a gana tres sèt di Hurricane i logra pues su di dos triunfo. Den maskulino superior Green Tigers a superá Titus ku 3-1.
Federashon Vòlibòl di Kòrsou (Fevoko) a kontinuá djadumingu ku e kompetensia lokal di vòlibòl den sala Errol Rooi di Sentro Deportivo Kòrsou (SDK) na Brievengat. Tabatin seis enkuentro programá: dos den klase superior i kuater den klase A.
Den divishon maksimo femenino Hurricane ku wikènt pasá a gana di Watakeli 3-2, ayera a derotá Shuatanari ku skor di 3-0. E parsialnan ta 25-21, 25-20 i 25-18. Shuatanari awor tin 2 triunfo i 1 derota. E tim anteriormente a gana di Watakeli (3-1) i Green Jewels (3-0).
Den klase superior maskulino Green Tigers a gana su promé wega den e kampionato nobo. Ela superá Titus ku skor di 3-1 (25-20, 23-25, 25-22 i 25-22) i awor tin 1 triunfo i dos derota. Anteriormente e ekipo a pèrdè di Watakeli (0-3) i Stakamahakchi (2-3). Ainda Titus no a gana den e kompetensia.
Warwarú ta sigui invikto den klase A maskulino. Ayera e tim a pèrdè e promé set 25-27 pa despues gana e sigiuiente dos sètnan ku skor 25-26 i 15-11 kontra di Titus.
E otro wega den maskulino A entre Watakeli i Xaverianen tambe a bai tres set. Xaverianen a sali riba bon pia ganando e promé sèt ku skor di 25-20, sinembargo Watakeli a bin rabiá bèk den di dos sèt (25-8) pa despues sigurá e triunfo ganando e di tres sèt ku 15-13.
Den klase A femenino Watakeli a superá Xaverianen ku skor di 2-01. E parsialnan ta: 20-25, 25-8 i 15-12.
De e otro wega femenino den klase A Shuatanari a gana ku skor di 2-0 di Stakamahakchi. E parsialnan ta: 25-21 i 25-23.
Foto: Jacinto de Jesus