Skèrpènè ayera, djasabra 1 di dezèmber 2018, a gana su di tres enkuentro i awor ta su só na promé lugá den Liga MCB. E tim di fraternan a superá Jong Holland ku skor di 2-0. Centro Social Deportivo Barber a pèrdè su promé punto den e kampionato ora ela empatá na 1 gol ku Sport Unie Brion Trappers (SUBT).
Federashon Futbòl di Kòrsou (FFK) a kontinuá den wikènt ku e kampionato nobo ku sinku wega den Stadion Antoine Maduro na Kintjan. Ta trata dje di 3 seri di wega dje kompetensia den promé divishon, esta Liga MCB.
Vriendschap Eendracht Sterken Tegen Alles (VESTA) i Union Deportivo Bándabou (Undeba) djabièrnè a parti punto: 2-2. Na apenas di 4 minüt Mirco Colina Jr a habri e skor pa VESTA, pero tres minüt despues Norvianel Naar e tabla e wega pa e tim di Bándabou. Colina Jr. na di 32 minüt a bolbe skor p’e tim di Buena Vista i besindario: 2-1. Na di 52 minüt Kevin Lodovica a skor e gol di empate.
Skèrpènè ayera djasabra a gana su di tres enkuentro den mesun tantu salida, derotando Jong Holland 2-0. Nicolaas Rocha na di 9 minüt a pone e tim di fraternan dilanti. Na-Jir Peny na di 79 minüt ta sigurá e viktoria. Esaki tabata e di dos derota siguí pa e tim kampion di Kòrsou.
Den e di dos wega riba djasabra Centro Social Deportivo Barber i SUBT a empatá na 1 gol. Tur dos gol a kai den final dje di dos tempu. Rogyear Anita na di 78 minüt a habri e skor pa Barber, miéntras ku Gustavo Lopez Dorado 4 minüt despues a tabla e wega pa e tim di Kintjan. Ku e empate Barber a pèrdè su promé punto i awor tin 5 punto for di 3 enkuentro.
Awe djadumingu CVV Willemstad a vapuleá Jong Colombia: 5-1. Vilyson Lake a habrí e markadó na apenas e promé minüt di wega. Na di 19 minüt Christopher Willemse a hasi e skor 2-0. Joeward Hoogebergen na di 42 minüt a hasi e wega 3-0. Despues di sosiegu Willemse a skor su di dos gol dje wega. Esaki tabata na di 72 minüt. Stallone Isenia na di 76 minüt tabata outor dje di sinku gol. Na di 80 minüt Christopher Martina ta salba honor pa Jong Colombia.
Den e otro wega awe djadumingu 2 di dezèmber, Centro Dominguito a gana di Victory Boys. Norman Hoyer na di 72 minüt di wega a skor e úniko gol.