Warwarú ta sigui invikto den klase A maskulino di Federashon Vòlibòl di Kòrsou (Fevoko). Ela gana ayera, djadumingu 2 di dezèmber 2018, ku skor di 2-0 di Xaverianen.
E kampionato nobo di Fevoko ku ta dediká na Dito Ravenstein a sigui ayera ku kuater wega den sala Errol Rooi di Sentro Deportivo Kòrsou (SDK): 3 wega den klase A i 1 enkuentro den klase superior.
Den klase A maskulino Warwarú a kontinuá su racha di triunfo. E tim a gana di Xaverianen ku skor di 2-0. E parsialnan tabata 25-17 i 25-21.
E otro wega den klase A maskulino tabata entre Watakeli i Stakamahakchi. E enkuentro aki a bai tres sèt. Watakeli a sali gana e promé ku 25-19. E di dos sèt despues di un lucha tenás a kaba den 25-23 pa Stakamahakchi: 1-1. Den e di tres sèt tambe e timnan a bringa duru kontra otro pero finalmente Watakeli a gana esaki ku 16-14.
Den klase A femenino Shuatanari a gana ku 2-0 di Xaverianen. E parsialnan tabata 25-20 i 25-21.
Den klase superior femenino Hurricane a bolbe gana. E tim a superá Green Jewels ku skor di 3-0: 25-14, 25-12 i 25-11.