Skèrpènè ayera djasabra despues di 51 aña a bolbe titulá kampion lokal di futbòl. E tim a gana di SV Vesta den prolongashon ku skor minimo (1-0) i tuma revancha dje derota den final di aña pasá, strobando e tim di Buena Vista pa bolbe konkistá e titulo kampionil e aña’ki.
E final den Liga MCB a tuma lugá den Stadion Ergilio Hato ubiká den Sentro Deportivo Kòrsou (SDK). Pa motibu di medidanan kontra di Covid-19, no a pèrmití públiko riba tribuna.
SV Vesta tabata e gran faborito pa bira kampion. Esaki ta basá riba estadistikanan. Fuera ku e tim di Buena Vista ta kampion di 2019/2020, tambe ela gana Skèrpènè na tres okashon e aña’ki.
Den kampionato regular Vesta a triunfá ku skor minimo 1-0 riba Skèrpènè. Den Kaya 6 e tim di Buena Vista i bisendario a gana atrobe: 3-1. Finalmente den Kaya 4 tambe Vesta a sali viktorioso: 3-0.
Tin ku remarká sinembargo ku den kampionato regular Skèrpènè a terminá na di dos lugá ku 34 punto tras di Jong Holland ku tabatin 42 punto. Vesta a kaba empatá ku Inter Willemstad ku 30 punto na di kuater puesto.
Den Kaya 6 tabata Vesta ku a tèrminá na di dos puesto ku 10 punto tras di Jong Holland ku tabatin 15 punto. Skèrpènè a kaba empatá ku Inter Willemstad ku 7 punto na di tres lugá.
Den Kaya 4 tabata Skèrpènè ku okupá e promé puesto ku 6 punto, miéntras ku Vesta ku 5 punto a tèrminá na di dos lugá. Asina e dos timnan aki a klasifiká pa final ku a hunga ayera.
Meskos ku aña pasá, e aña’ki tambe e final a bai prolongashon. Kontrali na kamponiato pasá e wega e bia’ki no a bai tiru di pinalti, pero a keda disidí den e promé tempu di 15 minüt.
Tabata Maximiliano Ciarnello di Skèrpènè ku despues di un fayo den mediokampo a kue e bala bai gol ku né i a skor na di 93 minüt dje wega. Sobra dje promé tempu i tambe e dos parti di 15 minüt no tabatin mas gol.
Esaki ta di kuater biaha ku Skèrpènè ta titulá kampion di futbol: un biaha di Antia na aña 1967 i dos biaha kampion di Kòrsou den temporadanan 1964/65 i 1968/69. Kemen despues di 51 aña e tim a bolbe konkistá e titulo kampionil di Kòrsou.
