Matthew Sophia ta Deportista di Aña 2021 di Kòrsou i asina gana e prestigioso Premio Bèto Adriana. Porsierto ku e atleta aki a sali tambe deportista hubenil maskulino di 2021.
Federashon Deporte I Olimpiko Kòrsou (FDOK) a organisá awenochi, djarason 6 di aprel 2022, e tradishonal gala pa saka mihó deportistanan, tim, dirigente i arbitro di aña 2021. Esaki tabata titulá FDOK Honors Night i a tuma lugá den edifisio di PWFC,
Un tremendo publiko a gosa dje evento, ku a konta ku transmishon bibu tambe. Tabatin diferente kategoria kaminda a skohé e mihó deportistanan tantu femenino komo maskulino di aña pasá.
E mihó deportista hubenil femenino di 2021 a resultá hungadó di sòfbòl J’Dah Girigorie. Marie-Antoinette Keli ku ta praktiká tènis di mesa a sali deportista femenino senior di aña 2021. Matthew Sophia tabata e mihó deportista maskulino hubenil di aña pasá, mientras ku e hungadó di biyar Jeffrey Nieuwenhuijzen a konkistá e titulo di deportista maskulino senior 2021.
Finalmente for dje kuater kategorianan ariba a skohe e deportista di aña 2021 di Kòrsou. Esaki a resultá Matthew Sophia ku proksimamente ta representá Kòrsou den próksimo Weganan Odesur i tambe Carifta Games.
