Den un wega ku un total di 29 kareda ayera, djasabra 22 di sèptèmber 2018, Souax Gill Sport a titulá kampion di divishon A. Ela gana ku skor di 15-14 di Vipers i asina promové pa dòbel A di Curaçaosche Softball Bond (CSB).
Souax Gill Sport e aña’ki por mira’tras riba un aña éksitoso den divishon A di CSB. E tim a pone e chèri riba e bolo djasabra den Buena Vista Ballpark, titulando kampion. Awor e ekipo aki ta promové pa divishon máksimo, esta dòbel A.
E enkuentro entre Souax i Vipers fuera di tabatin 29 kareda i 23 hit, a keda deslusí tambe pa 11 eror. Apesar di tur esaki, e tabata un wega hopi emoshonante.
Picher Kiara Domacassé a gana e wega pa Souax Gill Sport ku a laga Vipers den tereno. Joanna Benita ku a tèrmina ku 2 hit den 4 turno, a skor e kareda ganadó riba hit di Ashanty Alexandre. Picher Francheska Luciano a pèrdè, miéntras ku Ruthshaina Henriquez a resultá mihó bateadó dje enkuentro ku 3 hit den 5 turno (5-3). Pa Souax Gill Sport: 15 kareda, 10 hit i 6 eror. Vipers: 14 kareda, 13 hit i 5 eror.
Den divishon máksimo di CBA, tambe tabatin wega ayera. Pichingolo Nissan a gana e promé wega den semi final kontra di Eagles Softex: 5-0. Picher Arnalda Margaritha a gana, miéntras ku Julise Koffy tabatin un anochi perfekto na bate ku 2 hit den 2 turno. Picher Richella van Gennip a pèrdè e enkuentro. Yetsely Helmijr tambe a dal e bala bon: ela kaba ku 2 hit den 2 turno. Pa Pichingolo Nissan 5 kareda, 6 hit i 0 eror. Eagles Softex: 0 kareda, 7 hit i 4 eror.
E timnan ta bolbe hunga kontra di otro djaweps awor. Un viktoria pa Pichingolo ta nifiká ku e tim ta pasa pa final kontra di Sta Rosa Angels Vanddis. E wega aki ta tuma lugá den Frank Curiel Ballpark na Sta Maria.
Mañan djaluna, 24 di sèptèmber e ‘play-off’ ta kuminsá den divishon máksimo maskulino di CSB. Tin dos enkuentro den Buena Vista Ballpark. e promé wega ta entre Clase Aparte i Harlem Power. Esaki ta kuminsá 8or di anochi. Pa 10’or ta topa otro Dream Team i Suffisant Eagles.
