Despues di a pèrdè e promé wega, Souax Gill’s Sport a gana dos wega di The Fighting Team pa asina pasa pa e gran final di sòfbòl fast pitch femenino, esta Liga MCB-CSB. E tim a gana e di tres alabes wega desisivo den semi final ku skor pèrtá di 6 pa 5.
Un nota remarkabel dje semi final entre The Fighting Team i Souax Gill’s Sport ta ku tur e tres weganan a kaba ku diferensia di 1 kareda i tambe ku e timnan lagando otro den tereno.
Den e di tres i ultimo wega tabata Ashanty Alexandre ku a bati e hit di oro. Por sierto ku ela kaba e wega tambe komo e mihó batiadó ku 3 hit den 4 turno.
J’Dah Girigorie tabata e picher ganadó. Souax Gill’s Sport a skor 6 kareda riba 8 hit. E tim a komete 3 eror.
Picher pèrdèdó a resultá Ruth-shainny Calmera, miéntras ku Suëny Felicia a bati 2 hit den 4 turno na bate. Pa The Fighting Team 5 kareda, 7 hit i 2 eror.
Awor Souax Gill’s Sport ta bai hunga final kontra di Pichingolo Nissan ku porsierto a derotá e tim di Souax den dos wega dje prefinal. Pues awor nan ta bolbe topa otro den e gran final. E promé wega ta djaweps awor, 11 di novèmber.
