Den siman i tambe wikènt tras di lomba tabatin hopi akshon di beisbòl di Liga RBI. Fuera di weganan dje kampionato regular, a hunga tambe e wega di strea i tambe tabatin un try out na Tio Daou Ballpark.
Primeramente e kampionato regular di RBI patrosiná pa Maduro & Curiel’s Bank (MCB) a kontinuá ku tres wega. Ta trata di enkuentronan reprogramá. A kanselá esakinan anteriormente pa motibu di áwaseru.
Firebrids Padres a gana di Marchena Braves ku skor di 6-3. Wilmer Bazur a resultá e picher ganadó, miéntras ku K-yon Adamus a bai di 3-3 pa Padres. Picher pèrdèdó tabata Chelton Jones i Jahzeel Groetelaers a bati e úniko hit pa Braves.
Wild Cats/St. Michiel Dodgers a superá Royal Scorpions Cardinals ku skor di 6-4. Picher Cleavon Lasten a gana, miéntras ku Greggson Juliana a bai di 2-1 pa Dodgers. Picher pèrdèdó tabata Jayverson Rellum i Jaydon Gosepa a bai di 3-2 pa Cardinals.
E último wega ku a hunga pa kompletá promé buèlta di RBI 2021 a bai entre Sta. Rosa Indians i Suffisant Royals. Jamil Zalm a resultá e picher ganadó pa Indians i mihó bate tabata Rodmar Angela bayendo di 3-2. Den e wega aki Indians a konektá tres tripel i un honron. Rodmar Angela; Qyshawn Legito; Nyzar Martins-Pereira ku tripel i Angela dal un honron tambe.
E kampionato di RBI 2021 ta sigui den fin di siman kuminsando for di mañan djabièrnè 12 di novèmber na Tio Daou Ballpark. Fanatikonan por sigui e weganan di forma digital via iScore i tambe por bishitá e website www.rbicuracao.com, unda por haña tur informashon i resultadonan.
E selebrashon di beisbòl a kontinuá djasabra ku Wega di Tur Strea ku partisipashon di 36 pelotero. E tim manehá pa manager Hooi a gana dje selekshon bou di guia di manager Benita ku skor grandi di 10 pa 1. Pa e tim ganadó tantu Gensley Ryan i Aiden Kimmenaede a bai di 2-2 na bate i picher Gyasi Isenia a gana. Maryelo Chirino a bai di 1-1 i Jaydon Gosepa a konektá honron den kousa pèrdí. Picher pèrdèdó tabata Keorden Leito.
Finalmente djadumingu un total di 25 hóben pelotero a hasi try out dilanti di diferente scout lokal i stranhero. Nan a demonstra nan talento den vários aspekto di beisbòl. E scoutnan a haña bon oportunidat pa evaluá e talentonan lokal i awor lo traha nan rapòrtnan kustumbrá.
