Souax Softball Team i Treasure New Era a titulá kampion dje di dos edishon di Torneo Candia ‘Shishi’ Paulo-Felipa. Den final e sòbolistanan di Souax a superá Dream Girls den kategoria U21 Fast pitch, miéntras ku Treasure a gana Rising Trotters den divishon Slow pitch 35+.
E di dos torneo Candia ‘Shishi’ Paulo-Felipa a resultá atrobe éksitoro. E kompetensia a tuma lugá Post 6 Ballpark na Rio Canario. Riba e último dia tabatin animashon di grupo di tambú Riba Ruta.
E torneo ta konsistí di dos kategoria: divishon 35+ i U21 Fast pitch. Den klas 35+ tin seis tim: Mas Goso, Treasure New Era, Sin Stress, Shinning Stars, Warriors i Rising Trotters. Den divishon U21 Fast pitch ta kompetí tres tim: Sta Rosa Angels, Souax Softball Team i Dream Girls.
Den U21 Fast pitch e tim di Souax tabata e mihó. Den final ela gana ku skor abultá di Dream Girls 15-2. Den Slow pitch 35+ Treasure New Era a gana ku skor di 11-7 di Rising Trotters.
