Titus kasi a bolbe zona un kampanaso ora ku ayera, djadumingu 9 di dezèmber 2018, e nobatonan a pone Watakeli lomba kontra di muraya den kontinuashon dje kampionato di Kòrsou den klase superior maskulino. E tim kampion sinembargo a bòns bèk i asina despues di hopi soda konservá su invikto.
E kompetensia lokal di Federashon Vòlibòl di Kòrsou (Fevoko), dediká na Dito Ravenstein, a sigui ayera den sala Errol Rooi di Sentro Deportivo Kòrsou (SDK) na Brievengat. Tabatin tres enkuentro den divishon máksimo dje organisashon.
Despues ku djarason Titus a zona un kampanaso kontra di supkampion Xaverianen (3-2), e tim a presentá atrobe hopi inspirá pa purba tumba kampion Watakeli tambe. E nobatonan a sali brabu ganando e dos promé sètnan ku 25-21 i 25-22 i asina pone nan kontrinkante ku lomba kontra muraya.
Watakeli a demonstrá dikon e ta kampion i siendo den pèrtá a bòns bèk atrobe e kompetensia aki. E tim a kòrtá e ventaha di Titus ganando e di tres sèt relativamente fasil ku skor di 25-11 (1-2). Tur dos tim despues a fahá formalmente ku otro den di kuater sèt i den un seri emoshonante e kampionnan a gana 32-30 pa asina empatá e wega 2-2.
Den e di sinku sèt Watakeli atrobe a demonstrá su kalidat kampionil i a pone Titus fasil un banda: 15-4. Ku e triunfo aki Watakeli a sigui invikto den e kompetensia. Apesar dje derota, Titus di su banda a mustra di por kompetí na nivel haltu i duna tremendo bataya.
Den e otro wega den divishon superior maskulino Xaverianen parse a rekuperá dje derota sorprendente djarason ei kontra di Titus. E supkampion di Kòrsou a superá Green Tigers den tres sèt: 25-20, 25-17i 25-20.
Den klase superior femenino Stakamahakchi tambe a sigui invikto. E tim a gana ku 3-0 di Watakeli ku den promé sèt a duna bon bataya. E parsialnan ta: 26-24, 25-13 i 25-16.
E kampionato ta sigui awenochi, djaluna 10 di dezèmber, den sala Errol Rooi di SDK ku dos enkuentro den klase A maskulino. Tur dos wega ta kuminsá 8’or: Green Tigers vs Stakamahakchi i Xaverianen vs Titus.
