Souax Gill’Sport ayera, djabièrnè 10 di mei 2019, konkistá e titulo kampionil den kategoria hubenil di Curaçaose Softball Bond (CSB). Den e di dos wega di final ela superá Pichingolo Nissan ku skor di 8-5.
E di dos wega di final den kategoria hubenil di CSB tambe a tuma lugá den Sabana Ballpark di Richard ‘Chati’ Constancia. Porsierto ku e mes tabata anunsiadó i manera di kustumber ela sá di entretené e fanátikonan durante e konfrontashon.
Souax Gill’Sport a hunga un tremendo kompetensia regular i tambe seri prefinal i e gran final ku a konsistí di un seri mihó di tres wega. E tim di Souax a gana e dos weganan di Pichingolo Nissan: e promé ku 5-2 i ayera ku 8-5.
Den komienso dje di dos wega final Souax Gill’Sport a tuma ventaha di 2-1, pero despues Pichingolo Nissan a empatá e enkuentro i asta bai dilanti. E timnan tabata hopi pareu ku algun bunita hugada. E partido a yega último inen empatá na 5 kareda.
Den su último turno na bate Souax Gill’Sport a hinka 3 kareda pa asina bolbe tuma ventaha: 8-5. Pichingolo Nissan no tabatin kontesta riba esaki i asina e wega a kaba ku e tim di Souax birando kampion den kategoria hubenil di CSB.
Picher Kiara Domacassé atrobe a kleim e triunfo pa Souax Gill’Sport, miéntras ku Ashantely Alexandre a sobresalí na bate ku 2 hit den 3 turno. Pa Souax: 8 kareda, 5 hit i 2 eror. Picher Melany Castro a pèrdè pa Pichingolo Nissan, miéntras ku Stephmary Smith tambe a bati 2 hit den 3 turno.
Komo hungadó mas balioso dje seri final a sali Joanna Benita. Ela destaká pa su bon bateo.
