E final di sòfbòl hubenil di Curaçaose Softball Bond (CSB) ta sigui awenochi, djabièrnè 10 di mei 2019, den Sabana Ballpark. Souax Gill’Sport ta un viktoria alehá for dje titulo kampionil kontra di Pichingolo Nissan.
E final di sòfbòl hubenil a ranka sali djarason. E seri di mihó di tres wega ta bai entre Souax Gill’Sport i Pichingolo Nissan.
Souax Gill’Sport a gana e promé enkuentro ku skor di 5-2. E picher ganadó tabata Kiara Domacassé. E hóben aki a tira 7 ponche den 7 inen. Ela pèrmití pues 2 kareda riba 6 hit. Joanna Benita a sobresalí na bate pa Souax ku 3 hit den 4 turno.
Souax pues ta 1-0 dilanti den e seri final i falta un triunfo mas pa titulá kampion. Pichingolo Nissan pues ta bai purba di gana e konfrontashon di awenochi pa asina forsá un wega desisivo. E di dos enkuentro final aki ta tuma lugá den Sabana Ballpark i ta kuminsá 7’or.