Despues di tres triunfo den e kampionato di beisbìol Dòbel A, Sta Maria Pirates Chippie a sufri su promé derota. Tabata Marchena Braves ku awe, djaluna 6 di mei 2019, a bin djatras pa kibra e invikto dje kampion di Kòrsou ku skor di 4-3.
E kampionato nobo di Federashon Besibòl Kòrsou (Febeko) a sigui awenochi den Stadion Johnny Vrutaal na Rif, Otrobanda. Esaki tabata e di 13 enkuentro den e kompetensia ku e aña aki tambe ta patrosiná pa Aqualectra NV.
Sta Maria Pirates a kuminsá e wega hinkando 1 kareda den su promé turno na bate. E kampion di Kòrsou a amplia e skor ku 2 kareda mas den di kuater inen i tabata mustra manera ta bai logra su di kuater viktoria siguí.
Despues di seis inen sin por a skor, Marchena Braves ta logra hinka su promé kareda den bòm di su di shete turno: 1-3. Den e sigiuente inen e tim di Marchena ta bòltu e skor inesperadamente ora ku e hinka 3 kareda pa tuma ventaha: 4-3. Sta Maria no a logra hinka kareda den su último turno i asina sufri su promé derota dje kampionato.
Picher Servinus a gana e wega pa Marchena Braves. Ela drenta di relevo den di shete inen na lugá di picher habridó Benita, ku durante 6 inen a pèrmití 3 kareda riba 5 hit. Servinus den 3 inen di relevo no a pèrmití kareda ni hit na Sta Maria Pirates, aunke ku ela regalá 4 ‘base por bola’ i ponchá 2 Pirata.
Alexander Henrietta tabata e hòmber grandi pa Marchena Braves na bate. Ela bati 1 hit den 2 turno. Esaki tabata un homerun i ku esaki ela sòru pa hinka 2 kareda aden pa su tim. Alex Henrietta tambe tabata bon den kaha di bateo: 2 hit den 4 turno. Finalmente Van Blarcum a kaba ku 1 hit den 1 turno.
Picher pèrdèdó a resultá Martis. E tabata e di dos relevista ku a mira akshon pa Sta Maria Pirates. Bloem a kuminsá riba montíkulo pa e tim kampion di Kòrsou i a pèrmití solamente 1 hit den tres inen di trabou. Den di kuater inen ela traha lugá pa Lourens ku tambe den tres inen a pèrmití 1 hit só. Martis den 1,2 inen a haña 4 kareda kontra riba 4 hit, entre nan e homerun di Alexander Henrietta.
