Wild Cats Guardian Group/KJ74 awe tra’i mèrdia, djadumingu 5 di mei 2019, no tabatin kompashon ku Sta Rosa Indians ENNIA/Jeep: 13-3. Den oranan di mainta Royal Scorpions Mr Baseball CPS/AGT a superá Fire Birds Skènikèsh ku skor di 7-4.
Federashon Beisbòl Kòrsou (Febeko) a sigui awe djadumingu ku e kampionato nobo ku dos wega den Stadion Johnny Vrutaal na Rif, Otrobanda.
Despues ku Royal Scorpions i Fire Birds a skor 1 kareda den promé inen, e Skòrpiunnan a bai dilanti den nan di dos turno: 3-1. Ku 1 kareda den di tres inen i despues 2 kareda den su di kuater turno, Fire Birds ta pika dilanti den e wega: 4-3.
Royal Scorpions despues di tres inen sin skor kareda ta empatá e wega i alabes tuma ventaha ku 2 kareda den di seis inen: 5-4. Ku atrobe 2 kareda den su di 8 turno e tim Skòrpiun ta fihá e skor final na 7-4.
Picher Ramses Jamanika a sigurá e triunfo pa Royal Scorpions. Ela drenta wega di relevo den di 4 inen na lugá di Rodienne Albertus ku na su turno a relevá picher habridó Temesh Lourens. Jamanika den 4,1 inen di trabou no a pèrmití kareda pero wèl 4 hit. Ela ponchá 6 bateadó.
Dennis Gustina, Curtney Doran i Rhiency Imperator a sobresalí na bate pa e Skòrpiunnan. Tur tres a bati 2 hit den 4 turno. Nan kompañero Roderick Bernadina a dal 1 hit den 1 turno i a risibi 3 ‘base por bola’.
Picher Jurian Hansen a sufri e derota. Ela habri riba montíkulo pa Fire Birds i a pèrmití 5 kareda riba 7 hit den 5,1 inen di trabou. Den di seis inen Ludwin Obispo a drenta na su lugá i a pèrmití 2 kareda riba 5 hit.
Aldrinne Anastacia, Laishenel Lacruz i Gedion Noor a destaka den kaha di bateo. Anastacia a bati 2 hit den 3 turno. Lacruz a dal 3 hit den 5 turno, miéntras ku Noor tambe a bati 2 hit pero den 4 turno.
Den e di wega awe djadumingu Wild Cats despues di apenas 3 inen tabata ganá 9-0. Sta Rosa Indians a skor su promé kareda den di sinku inen i a skor 2 kareda mas den di seis inen. E Pushinan Brabu a skor 2 kareda den nan di sinku turno i despues 1 kareda den tantu di seis i shete inen: 13-3.
Wild Cats a dal 14 hit, bou di kua no menos ku 4 doblete i 1 triple. E mihó barteadónan tabata Randolph Kirindongo, Shurendell Mujica i Yurendell de Caster. Kirindongo a bai di 3-2 ku 3 kareda empuhá. Mujica i De Caster tabatin 3 hit den 4 turno.
Picher Swenton Martina a gana e wega. Den 5 inen di trabou ela pèrmití 2 kareda riba 6 hit. Picher pèrdèdó a resultá Jordan Quan ku den 1,1 inen a pèrmití 3 kareda riba 3 hit.
