Sta Maria Pirates Chippie ta e kampion nobo di Kòrsou den beisbòl dòbel A. E tim ayera, djasabra 27 di oktober 2018, gana e di seis wega dje seri final den Liga Aqualectra ku skor di 4-1 di Wild Cats Guardian Group/KJ74 pa asina konkistá e título kampionil.
Federashon Beisbòl di Kòrsou (Febeko) ku presidente Micheline Heyliger por mira tras riba un éksitoso kampionato e aña’ki. Aqualectra i Kenley Jansen a patrosiná e kompetensia.
E seri final tabatin un desaroyo hopi interesante, kaminda tres dje seis weganan a bai èkstra inen. E ‘play-off’ tabata un ‘best of 7’, pues e tim ku gana kuater wega ta kampion.
Sta Maria tabata e tim ku semper tabata den ventaha den e seri final. Despues di a gana e promé enkuentro, e Piratanan la pèrdè e di dos, gana e di tres wega, pèrdè e di kuater pa finalmente superá e Pushinan Brabu den e di sinku i seis konfrontashon.
Den e wega di ayera’nochi den Tio Daou Ballpark e dos timnan a wanta otro bon den e promé 3 inennan: 0-0. Sta Maria den su di tres turno aki a eksplotá i skor 4 kareda. E inen a kuminsá ku un ponche Rodney Michel. Sevard Seferina despues a bin bati i ku konteo di 1 ‘bola’ i 0 ‘strike’ ta bati homerun: 1-0.
Raycheron Carolina despues despues dje homerun a dal un ‘infield hit’ i despues Raydel Isabella a konektá un hit limpi pa ‘center field’. Ku 2 koredo na base a tuma lugá den kaha di bateo Sherman Lacrus i ku konteo di 3-1 e ta bati un doblete i empuhá 2 kareda: 3-0.
Despues ku Alexander Rodriguez a resultá e di dos out, Johannes Grgorius Jr a haña ‘base por bola’ intenshonal. Aki mènedjer di Wild Cats a kambia su picher habridó Kennimar Martina pa Richard Moesker. Ulrich Snijders a saludá e picher nobo aki ku hit pa ‘right field’ p’asina empuhá e di 4 kareda pa Sta Maria Pirates. Finalmente Sherwenne Antersijn a resultá di tres out pa kaba ku e agonia pa Wild Cats.
Den kabes dje di kuater inen Wild Cats a skor su promé kareda. Esaki despues di un out ora ku Randolph Kirindongo a bati pa tersera base. Levi Carolus ku a drenta den kaha di bateo despues, ku konteo di 2-0 ta bati un homerun: 1-4. Despues dje kareda’ki, Wild Cats a menasá poniendo 2 koredo na base via di ‘base por bola’ i un eror, pero dos ‘fly’ a sera e inen.
E skor despues no a kambia mas i finalmente Sta Maria a gana e enkuentro i asina kita e titulo for di Wild Cats.