Sta Rosa Angels a logra otro viktoria den kontinuashon dje kampionato fast pitch den dòbel A. E tim a gana e biaha’ki ku skor pèrtá di 5 pa 4 di The Fighting Team. Pichernan Janiska Franklin i Suheydi Faneyt a kombiná bon ku otro pa seyá e triunfo.
Faneyt a drenta di relevo ku base yen den di shete inen. Ela kuminsá poko tambaliente, pero a kue forma despues pa asina salba e wega pa Sta Rosa Angels.
Sta Rosa Angels tabatin 5 kareda, 8 hit i 2 eror. Picher ganadó a resultá pues Franklin, mihó bate tabata Jandely Ricardo ku a kaba ku 2 hit den 2 turno. The Figthing Team tabatin 4 kareda, 5 hit i tambe 2 eror. Picher pèrdèdó tabata Lee-Ann Craanberg, miéntras ku Stephmary Smith tabatin 1 hit den 1 turno.
Den otro wega picher J’Dah Girigorie a pèrmití 5 hit i ku yudansa di Kimberley Agard ku a bati dos hit i yuda hinka 2 kareda, Souax Gill’s Sports a gana di The Fighting Team ku skor di 5 pa 0.
Souax tabatin 5 kareda, 6 hit i 1 eror. Picher ganadó tabata J’Dah Girigorie i mihó bate Kimberley Agard ku 2 hit den 3 turno. Ivaniela Belfor tambe a dal 2 hit den 3 turno. The Fighting Team no a skor kareda, pero tabatin wèl 5 hiti 2 eror. Picher pèrdèdó a resultá Ruth-shainny Calmera i mihó bate tabata Suëny Felicia ku 2-2.
Den otro wega Pichingolo a gana Fenix ku skor di 9 pa 3. Pichingolo tabatin 9 kareda, 5 hit i 1 eror. Picher ganadó tabata Julise Koffy, miéntras ku mihó batiadó tabata Gianynuska Martina ku 2-1. Fenix tabatin 3 kareda, 4 hit I 3 eror. Picher Shurdaney Obispo a sufri e derota i Almarisca Hooi a bati 1 hit den 2 turno.
Souax Gill’s Sports tambe a gana di Pichingolo: 6 pa 4. Souax a kaba ku 6 kareda, 7 hit i no tabatin eror. Picher ganadó tabata Tafari Janga, miéntras ku miho batiadó tabata Tanusi Delando ku 2-2. Pichingolo a skor 4 kareda, 4 hit i a komete 1 eror. Picher Melanny Castro-Arias a sufri e derota i Ciröendra Peloz a bati 1 hit den 1 turno.
