Stakamahakchi a mantené su invikto den divishon superior femenino di Federashon Vòlibòl Kòrsou (Fevoko). E tim kampion di Kòrsou awenochi, 13 di mart 2019, a bini dja’tras pa gana ku skor di 3-1 di Hurricane.

E kampionato regular di Fevoko a kontinuá ku dos enkuentro den divishon superior den sala Errol Rooi di Sentro Deportivo Kòrsou (SDK) na Brievengat. E kompetensia ta dediká na e baluarte Dito Ravenstein.

Stakamahakchi den divishon femenino a konservá su status di invikto, aunke ku e tim a sali pèrdè e promé set 12-25 kontra di Hurricane. E tim kampion di Kòrsou sinembargo no a kai den paniko, pero a bin duru bèk i gana e sigiuente tres sètnan: 25-16, 25-13 i 25-19.

Den divishon maskulino tambe Stakamahakchi a mira akshon. E tim aki a gana ku skor di 3-0 di Green Tigers. Apesar ku e skor no a ilustrá esei, pero e Tigernan Bèrdè a lucha duru prinsipalmente den di tres sèt. E parsialnan tabata 25-14, 25-17 i 26-24 na fabor di Stakamahakchi.

Djaluna tras di lomba tambe a hunga dos enkuentro balido pa e kampionato regular. Esakinan tabata den klase A. Den kategoria femenino Xaverianen a sorprendé Watakeli ku skor di 2-1: 22-25, 25-20 i 15-11. Den e otro wega den mesun kategoria femenino Stakamahakchi a gana e klásiko kontra di Shuatanari: 2-1. E parsialnan: 25-17, 10-25 i 15-11.

E kompetensia di vòlibòl ta sigui djadumingo ku weganan tantu den divishon A komo klase superior. Den klase A femenino e sigiuente enkuentronan ta programá: Shuatanari vs Watakeli i Hurricane vs Xaverianen. E weganan aki ta kuminsá 4or di atardi.

Mitar di 6  tin dos enkuentro den divishon superior femenino: Watakeli vs Hurricane i Shuatanari vs Green Jewels.

Den oranan di anochi ta kuminsá ku weganan di playoff den divishon A maskulino. Warwarú ku a kaba na kabes ta sali kontra Titus ku a terminá e kampionato regular na di kuater posishon. Tambe Watakeli ku a okupá e di dos puesto den kompetensia regular ta hunga kontra number 3 ku ta Stakamahakchi.