Federashon di sòfbòl di Kòrsou (CSB) tin un direktiva nobo. E klupnan afiliá a nombra Fenton Thomasita dje organisashon Pichingolo komo e presidente nobo.
E nombramentu di Thomasita i otro miembronan dje direktiva a tuma luga siman pasá. Esaki a sosodé durante un reunion general extraordinario den e edifisio di Federashon Olímpiko I Deporte Kòrsou (FDOK) na Otrobanda.
,,No tabatin ningun kandidato postulá pa direktiva. E ora ei klupnan a disidí pa forma un direktiva konsistiendo di un miembro di kada organisashon. Pasobra Pichingolo ta e organisashon di sòfbòl ku mas aña di eksistensia, a pidi’é pa okupá e funshon di presidente,” Thomasita a deklará na Sport.cw.
E klupnan afiliá a pidi e reunion ku komo úniko punto di agenda: formashon di un direktiva nobo. Esaki tin komo tarea pa duna bida nobo na sòfbòl femenino fast pitch den e aña’ki. E tres obhetivonan prinsipal pa logra esaki ta: organisá e kampeonatonan di sòfbòl, mehorá e imágen di CSB i fortifiká e divishon di sòfbòl hubenil.
Thomasita ta asistí den e direktiva nobo di CSB pa Kenneth Pieter komo visepresidente, mientras ku Lernnerth Angela ta fungí komo sekretario general. Mas aleu Janiska Franklin ta e tesorero asistí pa Shelwyn Salesia komo di dos tesorero. Jerrel Helena i Shurendley de Lima ta respektivamente segundo sekretario i komisario den e direktiva nobo di federashon di sòfbòl di Kòrsou.