E tim di basketbòl Only The Family (OTF) a gana ku skor grandi su promé wega den kategoria Senior di G-league kontra di Fortuna Brothers: 94-57. E hungado di OTF, Ivan Martijn, tabata topscorer ku 29 punto i te ainda esun ku a skor mas punto den e kompetensia di basketbòl nobo.
OTF i Fortuna Brothers a hunga kontra di otro den sala di deporte Errol Rooi di Sentro Deportivo Kòrsou (SDK) na Brievengat. Esaki ta e dos wega den e kategoria di Senior di G-league.
Después di un komienso hopi pareu, OTF a tuma ventaha den e wega. Ivan Martijn i tambe Aytor Alberto a logra varios ‘slam dunk’ i asta a kombiná pa un ‘alley oop’. Alberto a skor 19 punto i tabatin 5 rebounds. Ademas Jaeden Nieveld tambe a hunga tremendo pa OTF i a skor 18 punto.
Den e wega inisial den kategoria Senior siman pasá, e tim di Janwe Spartacus a gana di Airbenders ku 94-51. Tres hungadó a terminá komo topscorer ku 18 punto. Nan ta Omar Henry i Nigel Mulders di Spartacus i Jordan Nicholson di Airbenders.
E kompetensia Senior den G-league ta sigui riba dia 13 di yüni den sala di deporte Errol Rooi di SDK. E wega aki ta bai entre Fortuna Brothers i Airbenders. Un dia despues, esta riba 14 di yüni, Spartacus i OTF ta topa otro den e mesun lokalidat deportivo den Brievengat.
E kompetensia di G-league ta sigui djasabra awor ku e promé wega den kategoria pa hungadónan di 16 aña i mas hóben (U16). Spartacus i Warriors ta Sali kontra di otro riba e kancha di basketbòl na skol Juan Pablo Duarte.