Pa di dos aña konsekutivo Pink Panthers a gana e titulo kampionil den e divishon Varsety di Women’s Basketball Association of Curaçao (WBAC). Den e wega final ku a tuma luga e wikènt ei, e tim a gana di Challengers ku skor di 36-28.
Panthers a bira kampeon invikto den e grupo di edat pa muchanan di 18 aña i mas hóben. E tim di Challengers a duna bon resistensia i den e final dje wega a purba di bin bèk. E tim a logra baha e desventaha di 14 punto te na 8 punto, pero esaki di mes no tabata sufisiente.
E timnan a kuminsá e promé 15 kwart basta pareu na otro. Panthers a kuminsá e di dos kwart ku un ventaha chikí di 2 punto (7-5), pero na final dje tempu aki tabatin 18-10 na su fabor. Den e di tres kwart, e bentaha a subi bai 31-17.
Den e kuater i último kwart di wega, e tim di Challengers pues a kuminsá un kontra atake. Ku 11 punto kontra 5, e tim aki tòg tabatin ku rekonosé su derrota kontra Panthers ku a gana finalmente ku 36-28. Asina Panthers ta bira kampeon pa di dos aña konsekutivo.
Caitlin ‘Cati’ Lichtenberg di Panthers i Isadora ‘Isa’ Francisca di Challengers a tèrminá e wega final aki komo topscorer. Tur dos a skor 12 punto.
