Jhonathan Bregita a sali kampion invikto dje kampionato di agedres rapido (blitz) di klup di agedres Capablanca. Ela gana tur su nuebe partidonan. Francisco Dewindt i Romer Jansen a tèrminá empatá na di dos puesto ku 7 punto, pero pa un diferensia chikí den puntonan di resistensia Dewindt a keda komo supkampion i Jansen di tres.
Na e kampionato anual di blitz un total di 22 miembro di klup di agedres Capablanca a kompetí. E kompetensia a konsistí di nuebe buelta, kaminda e weganan tabatin un durashon di 3 minüt pa pensa i 2 sekònde pa movida. Den blitz e agedresistanan tin ku ta lihé pues, loke algun biaha ta pone ku nan hasi fayo.
E proksimo evento di klup di agedres Capablanca ta un torneo di rapid chess ku tambe ta agdres rapido pero ku mas tempu pa partido. E weganan tin durashon di 30 minüt i 10 sekònde pa pensa. E kompetensia aki ta dura seis siman i ta ranka sali djasabra akí 8 di yüni. Tur djasabra ta hunga dos partido.
![](https://storage.googleapis.com/sportcwmedia/2024/06/ffa59e05-img-18-682x1024.jpg)
![](https://storage.googleapis.com/sportcwmedia/2024/06/ffa59e05-img-16-1024x682.jpg)
![](https://storage.googleapis.com/sportcwmedia/2024/06/a32bed41-img-17-1024x690.jpg)