E selekshon nashonal di futbòl di Kòrsou ta den un bon posishon pa pasa pa e di tres buelta dje torneo di kwalifikashon di Karibe pa Mundial. E tim a gana Aruba djasabra tras di lomba ku skor di 2-0. Kòrsou bou di direkshon di Dick Advocaat awor ta kompartí e promé puesto den grupo C ku Haiti, tur dos ku 6 punto.
Despues ku djarason 8 di yüni Kòrsou a derotá Barbados 4 pa 1, e selekshon a viaha pa Oranjestad pa hunga kontra di Aruba. E tin rubiano a logra tene e skor 0-0 den e promé tempu, apesar ku Kòrsou a dominá e akshonnan riba tereno i asta haña algun bon chèns pa habri e skor.
Tabata Juninho Bacuna ku finalemente a skòr e promé gol pa Kòrsou. Esaki tabata na di 58 minuut. Den tempu di leshon, esta den e minütnan èkstra despues di 90 minüt, e suplente Xander Severina a hinka e di dos gol.
Advocaat a kuminsá ku e sigiente futbòlístanan den e wega na Oranjestad kontra di Aruba: Cuco Martina komo kapitán, Eloy Room, Jurien Gaari, Sherel Floranus, Joshua Brenet, e rumannan Juninho i Leandro Bacuna, Godfried Roemeratoe, Kenji Gorré, Jearl Margaritha i Rangelo Janga.
Kòrsou ta kaba e promé mitar di e di dos buelta dje kwalifikashon di Karibe pa Mundial ku 6 punto for di dos wega den grupo C. E selekshon nashonal ta hunga atrobe te otro aña. Riba 6 di yüni Kòrsou ta topa Saint Lucia i riba dia 10 di yüni 2025 e kontrinkante ta Haïti.
Porsierto ku Haïti tambe a gana su dos weganan. E selekshon haitiano a gana ku skor di 2 pa 1 di Saint Lucia i ayera ku skor di 3 p 1 di Barbados. Pues Haiti i Kòrsou ta kompartí e promé puesto den grupo C ku 6 punto.