Fanátikonan di futbòl finalmente por bolbe gosá di futbòl lokal for di 9 di mei próksimo. Riba e fecha aki ta ranka sali e prome torneo pa Kopa Kòrsou. Esaki ta konta ku partisipashon di timnan di promé, segundo i terser divishon i tambe dje divishon senior di damanan.
Federashon Futbòl Kòrsou (FFK) i Fundashon Desaroyo Deportivo Kòrsou (FDDK) a uni forsa pa organisá e torneo di futbòl aki.
E idea pa organisá e kompetensia ta bini for di Hassnah Elhage, Igor Meijer i Angelo Hieronimus. Nan a aserká gerensia di FDDK ku un plan pa hinka bida bèk den futbòl lokal. E fundashon deportivo di gobièrnu a bai di akuerdo ku e inisiativa akí i a tene reunion ku e direktiva nobo di FFK, ku tambe a brasá i proyenkto un bes.
Entre tanto a instalá un komishon pa planifiká, promové, ehekutá i raportá tokante e preparashonnan pa e torneo pa Kopa Kòrsou. E komishon ta konsistí di Gilbert Martina (presidente di FFK), Vergilly Winklar (direktor di FDDK), Kenneth Bernabela, Harold Rol, Liviéna Rijnschot, Sam Hye i Marian Zimmerman.
A disidí kaba ku e torneo ta kuminsá dia 9 di mei i lo kaba dia 2 di yüli 2025, esta riba Dia di Bandera. E weganan ta tuma lugá prinsipalmente den wikènt, pero tambe ta hunga algun wega den siman.
E torneo ta tuma lugá den kuater stadion: Soto Arena na Bándabou, stadion Dr. Antoïne Maduro (Kintjan/Vredenberg), stadion Rignaal ‘Jean’ Francisca (Brievengat) i stadion Ergilio Hato den Sentro Deportivo Kòrsou (SDK) ku tambe ta na Brievengat.
