Selekshonnan di Liga Pabou a gana e Serinan di Distrito den Minor, Intermediate i Little League. Esaki ta nifiká ku e nan ta bai representá Kòrsou den kampionatonan regional dje tres liganan aki. Pero Liga Pariba tambe ta ba kompetí den e kompetensia di Little League di Karibe, komo ku esaki ta tuma liugá aki na Kòrsou.
Den Minor League e selekshon di Liga Pabou a logra 3 triunfo den 3 wega siguí riba Liga Pariba. E tim a gana e promé wega 5 pa 4, despies 16 pa 14 i finalmente ku e di tres wega ku skor di 9 pa 1.
E selekshon di Liga Pabou den Intermediate League a gana den kuater wega di Liga Pariba. Despues di a gana e promé wega ku skor di 4 pa 0, Pabou a pèrdè e di dos ku skor di 15 pa 3 i pone ku e seri a empatá na 1 -1. Pabou despues a gana e di tres wega ku skor di 3 pa 2 pa pika 2-1 dilanti. E selekshon di Pabou finalmente a superá Pariba tambe den e di kuater enkuentro: 5 pa 4.
Den Little League e Seri di Distrito a bai 5 wega kompleto. Liga Pabou a ranka sali ganando e promé wega ku skor di 6 pa 4. Liga Pariba a empatá e seri ganando e di dos enkuentro ku skor di 7 pa 0 pa despues bolbe logra un triunfo di 2 pa 1 pa asina tuma ventaha di 2-1 den e seri.
Liga Pariba pues tabata falta un viktoria pa gana e seri. E selekshon di Liga Pabou sinembargo no a entregá i a gana e sigiuente dos weganan ku skornan di 4 pa 2 i 9 pa 2 pa asina titulá kampion ganando e serie 3-2.
Tin ku informá ku Liga Pabou i Liga Pariba ta bai representá Kòrsou den e kampionato di Little League di Karibe, pasobra e kompetensia aki ta tuma lugá aki na Kòrsou. E ta tuma lugá di 6 pa 13 di yüli próksimo.
Awor ku e Seri di Distrito den Minor, Intermediate i Little League a finalisá, e serinan den Junior i Senior League ta ranka sali mañan djamars. E weganan entre Liga Pariba i Liga Pabou ta tuma lugá den Tio Daou Ballpark. E promé wega ta den Senior League i ta kuminsá mitar di 6 atardi. Djarason tin wega 5or atardi den Junior League i 8or anochi den Senior League.
FOTONAN JACINTO DE JESUS
