E hungadó di biyar Shamir Tremus a sali Deportista di Aña 2019, miéntras ku Vesta a konkistá e titulo di tim di aña. Federashon Deporte I Olimpiko Kòrsou (FDOK) a organisá e premiashon deportivo den Hotèl Renaissance, Otrobanda.
Durante un anochi di gala FDOK a premiá deportista, dirigente i arbitro ju a sobresalí aña pasá. E anochi tabata dediká na e baluartenan Ingrid van der Hilst-Melfort, Aubrey Linzey, Ronald Cornelis Goeloe i Patricio Fernandez Bridgewater.Komishon de Elekshom pa Premiashon 2019
E komishon di elekshon a konsistí di e sigiuente personanan: Aichel Richardson komo presidente, Stanley Coffy sekretario, Ruthsel Martina di dos tesorero, Renato Anasagasti i Silvanie Clarkeku, tur dos miembro di Salón di Fama i miembronan di prensa deportivo Roque Bernadina, Michael Sprott i Alexander Makaya.
Alexander Makaya a fungi komo maestro di seremonia, miéntras ku obispo Luis Secco tabata enkargá ku invokashon na komienso dje anochi di premiashon. Invitado di honor tabata promé minister Eugene Ruggenaath, mientras oradó di orden tabata presidente di FDOK Rignaal ‘Jean’Francisca.
Shamir Tremus ku a sali hungadó maskulino di aña, despues a gana tambe Kopa Beto Adriana ku ta nifiká ku ela sali e mihó deportista di 2019.
E premio pa mihó prospekto hubinil a bai pa Naydeon Donial Leiberia di Federashon Ahedres Kòrsou. Vanessa Mercera di Curaçaose Atletiek Bond a gana e premio di hungadó femenino hubenil. Mihó deportista senior femenino a resultá Ailen Mena di Federashon Ahedres Kòrsou, miéntras ku e premio pa deportista maskulino senior a bai pa William Sanchez di Curaçao Bodybuilding.
Ekipo di Aña a sali Vesta di Federashon Futbòl Kòrsou. Mihó dirigente tèkniko di 2019 ta Evan David Balentina di Curaçaose Softball Bond. Lennerth Esteban Angela di mesun Curaçaose Softball Bond a sali dirigente atministrativo di aña. Mihó arbitro ta Michael Anthony Carl Arvelo di Federashon Biyar Kòrsou.
