Jong Holland ta sigui na kabes den Liga MCB ku 25 punto for di 11 wega. E tim trikolor a tabla ayera,djadumingu 1 di mart, ku skor di 1-1 ku Centro Dominguito. Den e otro wega CVV Willemstad a superá Union Deportivo Bándabou (Undeba) ku skor di 2-1.
E kampionato organisá pa Federashon Futbòl Kòrsou (FFK) a kontinuá den wikènt ku 5 enkuentro den Stadion Dr. Antoine Maduro. E weganan ta balido pa Liga MCB, esta promé divishon.
Djabièrnè Vesta a derotá Subt ku skor di 2-1. Jeahdiel Lucas a habri markadó pa e tim barik’i hel. Esaki tabata na di 10 minüt. Mirco Colina Jr a tabla e wega na di 39 minüt i Charles Martina den tempu di leshon a hinka e gol ganadó pa Vesta.
Djasabra Victory Boys i Fortuna Kurá Piedra a empatá na 0 gol, miéntras ku Skèrpènè a gana ku skor di 1-0 di Centro Social Deportivo Barber. E úniko gol tabata di Christopher Isenia na di 62 minüt di wega.
Ayera djadumingu Jong Holland i Centro Dominguitu tambe a tabla, pero na 1 gol. Na di 43 minüt Randall Winklaar a pone Centro Dominguitu dilanti, mientras ku Rensley Leuteria na di 90 minüt a tabla wega. Winklaar ta komandá tabla di goliadó ku no menos ku 13 gol.
Den e di dos wega CVV Willemstad a superá Undeba ku skor di 2-1. Gersinio Constancia a pone e tim di Vredenberg dilanti. Esaki tabata na di 14 minüt. Lendell Johannes na di 22 minüt a tabla e wega, miéntras ku Davidson Rosa na di 55 minüt a hinka e gol di gana pa Willemstad.
