Stakamahakchi Guardian Group awe, djarason 4 di mart 2020, a gana otro wega den e kampionato di vòlibòl divishon superior femenino. La superá su eterno rival Shuatanari Lab de Med ku skor di 3-1. Den divishon maskulino suprerior Titus a zona un kampanaso derotando Wishi Tigers 3-0.
Federashon Vòlibòl Kòrsou (Fevoko) a kontinuá su kompetensia regular ku dos wega den Sala Errol Rooi di Sentro Deportivo Kòrsou (SDK) na Brievengat.
Den divishon superior femenino Shuatanari a kuminsá bon ganando e promé sèt ku skor konvinsente 25-14. Esei sinembargo tabata tur kos tambe, pasobra Stakamahakchi a gana e di dos sèt ku 25-20 pa empatá e wega i despues gana e sigiuente dos sètnan tambe pa sigurá otro viktoria: 25-19 I 25-19.
Den sekshon superior maskulino Titus a sorprendé Wishi Tigers ku skor di 3-0. E parsialnan tabata: 25-22, 25-15 i 25-18.
Anteriormente e kampionato a sigui djaluna ku kuater wega den divishon A. Den divishon femenino Watakeli a kai vensí kontra Stakamahakchi 2–0: 23-25 i 21-25.
Den e sekshon maskulino dos tim di Watakeli a hunga kontra di otro i tabata Watakeli A ku a sali viktorioso riba Watakeli B: 2-1. E parsialnan tabata 25-15,19-25 i 15-12.
Shuatanari tambe a mira akshon i kasi a zona un kampanaso . E tim hoben a kai kontra Xaverianen 2-1: 17-25, 25-19 i 17-15. E ultimo wega a bai entre Stakamahakchi i Titus ku Staka ganando 2 sèt ku parsialnan 25-23 i 25-21
E kampionto ta kontinuá djadumingu ku un kalendario kompletu ku wegana di klase A i klase superior kuminsado for di sinkor di atardi den Sala Errol Rooi.
