Skèrpènè a bira e di 7 tim ku a pèrdè di Jong Holland den kampionato di futbòl di Kòrsou promé divishon, esta Lig MCB. E Trikolornan a gana awe, djadumingo 14 di yanüari, ku skor di 2-0 dje aktual supkampion.
Federashon Futbòl di Kòrsou (FFK) a kontinuá e wikènt aki ké kampionato regular. Tur enkuentro manera kustumber a keda hungá den stadion Dr Antoine Maduro na Kintjan.
Jong Holland a sigui su racha viktorio awe djadumingu, derotando Skèrpènè 2-0. Tabata Quinton Burk ku na di 20 minüt a habri e markadó. E wega a bai sosegá 1-0 pa e Trikolornan. Na di 76 minüt di wega Jurensley Martina ta seya e di 7 triunfo pa su tim.
E Trikolornan ku e viktoria riba Skèrpènè a amplia su ventaha riba sobrá timnan i awor ta hopi kómodo na kabes ku 22 punto for di 8 wega. E úniko tim ku te ainda a logra kita punto for di Holland, ta Victory Boys den un wega ku a terminá empatá 0-0.
Den e di dos wega awe djadumingu e ekiponan ‘Vriendschap Eendracht Sterken Tegen Alles’ (VESTA) i Jong Colombia a Jong Colombia a parti punto. E enkuentro a kaba 0-0.
Apesar ku Hubentut Fortuna djasabra a gana ku skor minimo (1-0) di Inter Willemstad, e ta keda na último puesto riba tabla di posishon ku 6 punto for di 8 enkuentro. E úniko gol dje partido a keda di skor na di 5 minüt di wega pa Rendel Girigorie.
E enkuentro entre Centro Dominguito i Union Deportivo Bándabou (Undeba) djasabra a finalisá den un empate: 1-1. E tim di Bándabou a skor promé via di Luchently Vrutaal na di 22 minüt di wega. Shairon Bernardus na di 68 minüt a sòru pa e gol di empate pa Centro Dominguito.
Riba djabièrnè Victory Boys ta derotá Centro Social Deportivo Barber ku skor di 1-0. Gaspard Jean Baptiste a skor promé ku sosiego na 44 minüt e gol di viktoria.
Jong Holland ta komandá e tabla di posishon ku 22 punto, siguí pa Undeba ku 14 punto. VESTA ta okupá e di 3 puesto ku 13 punto, miéntras ku Inter Willemstad ku 12 punto ta doño dje di 4 posishon. Skèrpènè i Victory Boys ta kompartí di 5 puesto ku 11 punto, siguí na di 7 puesto pa Centro Dominguito ku 9 punto. Jong Colombia ta okupá di 8 puesto ku 8 punto, miéntras ku Centro Barber i Hubentut Fortuna ta respektivo 9 i 10 ku 7 i 6 punto.