Sport.cw

Sponsored by

Sponsored by

Sponsored by

Watakeli a tuma revancha

E kampionato lokal di vòlibòl a kontinuá ayera djadumingu, 14 di yanüari 2018, ku algun bon enkuentro den klase superior. Watakeli den un tremendo demonstrashon den klase maskulino a tuma revancha riba Xaverianen, pa e derota ku ela sufri luna pasá.

Federashon Vòlibòl di Kòrsou (Fevoko) por mira’tras riba otro wikènt di kompetensia ku weganan na nivel. E públiko ku a akudí na sala kubrí Errol Rooi di Sentro Deportivo Kòrsou (SDK) sigur a gosa dje enkuentronan.

Aña pasá, riba 12 di dezèmber, Xaverianen a kibra invikto di Watakeli den klase superior maskulino. Esaki a sosodé ku skor di 3-1. Awèl djadumingu tras di lomba Watakeli a presentá rabiá i na su turno a manda Xaverianen kas ku un fulminante derota komo revancha: 3-0.

Apesar ku Watakeli no a pèrdè niun sèt i e skor ta mustra fasil, tòg Xaverianen a bende su kueru hopi karu. Tabata un enkuentro duru bringá pa tur dos ekipo. E parsial tabata 25-17, 25-19 i 29-27.

Den klase superior femenino Watakeli no a logra mesun éksito ku e koleganan maskulino. E tim a pèrdè ku skor di 0-3 di Stakamahachi. E parsialnan: 18-25, 21-25 i 16-25.

Den e otro enkuentro den klase superior femenino Hurricane a kontinuá su racha viktorioso, derotando Green Jewels den 4 sèt: 3-1 ku parsialnan 21-25, 25-21, 25-15 i 25-19.

Tabatin ayera tambe un wega di klase A maskulino entre Titus i Stakamahachi, ku Titus ganando ku 2-0: 25-13 i 25-19.

 

 

 

 

Translate »