Centro Dominguito a logra su promé triunfo den e kampionato nobo di futbòl di Kòrsou, ku a kontinuá dhasabra 17 di novèmber 2018. E tim a gana ku skor di 2-1 Union Deportivo Bandabou (Undeba). Den e otro enkuentro di promé divishon Victory Boys i CVV Willemstad a parti punto: 0-0.
Federashon Futbòl di Kòrsou (FFK) ta organisá e kompetensia. Esaki, konosí komo Liga MCB, ta tuma lugá den stadion Dr Antoine Maduro na Kintjan i stadion Ergilio Hato na Brievengat.
E kampionato a sigui despues di kanselashon di weganan programá anteriormente. A kanselá esaki pasobra e organisashon di rèfri tabata ke pa regla i formalisá nan partisipashon promé.
E wega inougural riba 28 di oktober a bai entre Jong Holland i Sport Unie Brion Trappers (SUBT). E tim trikolor ku ta aktual kampion di Kòrsou i supkampion dje kompetensia pa Kopa ABC, a empatá 0-0 ku e ekipo di Kintjan ku despues di un aña den di dos divishon a promové bèk pa e divishon superior.
Despues dje kanselashon temporal dje kampionato, esaki a reanudá djabièrnè tras di lomba ku e wega entre aktual supkampion di Kòrsou Vriendschap Eendracht Sterken Tegen Alles (VESTA) i Centro Social Deportivo Barber, ku a kaba den un viktoria p’e tim di Barber: 3-0.
Djasabra Victory Boys i CVV Willemstad a tabla 0-0, miéntras ku Centro Dominguito ku tabata kampion na 2016 i 2017 a gana ku 2-1 di Undeba. E talentoso Ashar Bernardo ku kasi a bandoná e tim di Dominguito, a hinka e promé gol na apenas di 5 minüt. Lendell Johannes a empatá e wega na di 24 minüt pa Undeba, miéntras ku Geryon Alberto di 58 minüt a sòru pa e gol di viktoria.
Riba e foto e goliadónan pa Centro Dominguito. Na man robes Geryon Alberto i na man drechi Ashar Bernardus.
Foto: FFK/Liga MCB