E kampionato nobo di vòlibòl a sigui ku Watakeli ganando otro wega den divishon maskulino superior. E kampion di Kòrsou ayera, djadumingu 18 di novèmber 2018, tabatin ku lucha hopi duru pa superá eterno rival Xaverianen: 3-2.
E kompetensia di vòlibòl a kontinuá ayera ku kuater enkuentro den sala di deporte Errol Rooi di Sentro Deportivo Kòrsou (SDK) na Brievengat. Tres dje weganan aki a bai 5 sèt.
Den divishon superior maskulino Watakeli a bolbe gana i sigui invikto. E tim kampion di Kòrsou den promé instante a kai atras 2-0 kontra di Xaverianen ku ta aktual supkampion, pero a bini djatras ganando tres sèt pa sigui su racha viktorioso.
Xaverianen a sali gana e promé i di dos sèt ku skornan di respektivamente 25-23 i 25-22. E tim pues tabata falta pa gana un sèt mas pa superá su eterno rival. Watakeli sinembargo no a entregá i a gana e siguente tres sètnan pa sigurá otro viktoria: 25-18, 25-20 i 15-10.
Den e otro wega den klase maskulino superior Stakamahakchi i Green Tigers tambe a bai sinku sèt. Stakamahakchi a gana e promé dos sètnan ku 25-20 i 25-17. Green Tigers a empatá e skor 2-2 ganando e sigiuente dos sètnan ku 25-23 i 25-20. Stakamahakchi tabatin e mihó wega sinembargo den e último sèt: 15-10.
Den klase femenino superior Hurricane i Watakeli tambe a trit e públiko un wega emoshonante. E timnan tabata gana e sètnan pa bùrt di otro. Watakeli a sali ganá e promé set ku skor di 25-23. Huricane a empatá e skor 1-1 ganando di dos sèt ku 25-18. Watakeli a tuma ventaha di 2-1 ku triunfo di 27-25 den di tres sèt, pa despues Hurricane bolbe tabla e wega (2-2) ganando e di kuater sèt ku 25-20. Finalmente e di sinku sèt tambe a bai pa Hurricane: 15-10.
Den e otro wega den divishon femenino superior Shuatanari a triunfá fasil riba Green Jewels: 3-0. E parsialnan tabata 25-17, 25-12 i 25-12.