Kòrsou a gana ayera, djaluna 14 di ougùstus, di forma fasil su promé wega den Junior League World Series 2023. E tim di Liga Pabou a derotá esun di Repúblika Cheko ku skor kombinsente di 8 pa 0.
E kampionato mundial den Junior League ta tuma lugá na Taylor, Michigan na Merka. E kompetensia a kuminsá djadumingu.
Liga Pabou ta representá di mes Kòrsou i region di Latino Amérika den e World Series. Den su promé wega ayera e tim a demonstrá bon picheo, tremendo ofensiva i tambe fildeo kontra e representashon di Repúblika Cheko.
Tin ku menshoná e picher slengu Copra ku a tira un tremendo wega. Ela pèrmiti solamente 3 hit na e batiadónan cheko, miántras ku su koleganan a sosten’é ku 8 kareda riba un total di 10 hit, entre kua un homerun di e hungadó Casper.
E próksimo kontrinkante di Kòrsou ta Canada. E tim aki a gana ku skor pèrtá di 11 pa 10 di Puerto Rico. E ganadó dje wega aki ta klasifiká pa final dje pul internashonal.