Sport.cw

Sponsored by

Sponsored by

Sponsored by

Triunfo Liga Pariba i Pabou

Tantu Liga Pariba komo Pabou a gana awe, djadumingu 14 di yüli 2019, e di dos wega den e kampionato di Karibe di Little League. E selekshon di Liga Pariba a superá Cuba ku skor minimo (1-0), miéntras ku Liga Pabou a derotá Puerto Rico ku skor di 2-1.

Despues ku e kampionato di Karibe a ranka sali djasabra, e kompetensia a sigui awe djadumingu ku diferente wega. Komo pais anfitrión dje kampionato Kòrsou ta kompetí ku dos selekshon: Liga Pabou i Liga Pariba. E weganan ta tuma lugá na Post 6 i den Frank Curiel Ballpark na Sta Maria.

Un total di 11 selekshon ta partisipá den e kampionato di Karibe di Little League. Den pul A tin Liga Pabou, San Martin, US Virgin Islands, Aruba i Puerto Rico. E timnan den pul B ta Liga Pariba, Bahamas, Antigua, Republika Dominikana, Boneiru i Cuba.

Despues ku Liga Pariba a bini djatras pa gana di Bahamas 7-3 den e wega inougural, awe e tim a triunfá ku skor di 1-0 riba Cuba. Picher Rubiorne Manuel den 5 inen di trabou no a pèrmití niun hit ni kareda. Ela ponchá 11 batiado i duna 3 ‘base por bola’. Nathanael Cijntje a relevá den di 6 inen i e tampoko a pèrmití kareda ni hit. Ela ponchá tres batiadó.

Chey De Lanoy, Richny Frans i Nathanel Cijntje a sobresalí na bate. De Lanoy i Frans a dal kada un 1 hit den 1 turno, miéntras ku Cijntje a bati tambe 1 hit pero den 2 turno. E hit di Frans tabata un doblete ku a sòru pa e úniko kareda dje enkuentro.

Liga Pabou tambe a gana su di dos wega awe derotando Puerto Rico 2-1, despues ku ayera djasabra e tim a nòkout San Martin ku skor di 15-0. Den su di dos enkuentro e selekshon di Kòrsou a laga Puerto Rico den tereno.

Picher Jurdrick Profar a gana e wega di awe. Ela pèrmití 1 kareda riba 3 hit i a ponchá 11 batiadó i duna 1 ‘base por bola’. Curley Martha tabata e mihó batiadó pa Liga Pabou. Ela kaba ku 2 hit den 3 turno. Un dje hitnan tabata un homerun.

Liga Pabou a bai ariba den promé inen: 1-0. Puerto Rico a empatá e skor 1-1 den di dos inen, Finalmente Kòrsou a skor su di 2 kareda den di seis alabes último inen lagando e tim kontrali den tereno.

E kampionato di Karibe di Little League ta sigui mañan djaluna ku atrobe 5 wega: 4 na parke di beisbòl Post 6 na Rio Canario i 1 na Frank Curiel Ballpark na Sta Maria. Pa 10or US Virgin Islands ta hunga kontra di Aruba na Post 6 i tambe 10or den Frank Curiel Ballpark tin e wega entre Bahamas i Antigua. Pa 12or di mèrdia San Martin ta topa Puerto Rico; 4or Cuba vs Republika Dominikana i 7or Boneiru ta hunga kontra Liga Pariba Kòrsou.

Translate »