E selekshon di Liga Pabou a kuminsá e kampionato di Karibe di Little League ku un viktoria grandi. Ela nòkout awe, djasabra 13 di yüli 2019, e tim di San Martin ku skor di 15-0. E wega a bai apenas 3 inen.
E kampionato di Karibe di Little League a ranka sali awe ku dos wega den parke di beisbòl Post 6 na Rio Canario. Komo pais anfitrión dje kampionato Kòrsou ta kompetí ku dos selekshon: Liga Pabou i Liga Pariba.
Porsierto ku Liga Pariba a gana e wega inougural ku skor di 7-3 di Bahamas despues di tabata pèrdí durante henter e wega ku skor di 0-3. Liga Pabou ku ta e tim prinsipal di Kòrsou sí a sali brabu i sigurá e wega for di trempan.
Liga Pabou a skor 5 kareda den su promé turno, 4 den di 2 inen i 6 kareda den di 3 entrada pa asina nòkout San Martin 15-0. Picher ganadó tabata Kevin Rosina. Ela pèrmití solamente 1 hit, ponchá 8 batiadó i duna 2 ‘base por bola’.
Shendrion Martinus, Jurdrick Profar, Curley Martha i Nathan Castillo a sobresalí na bate pa Liga Pabou. Martinus a bati 3 hit den 3 turno i a sòru pa 3 kareda. Profar a dal 2 hit den 2 turno. E batasonan aki tabata homerun. E tambe a sòru pa 3 kareda. Martha tabata bon pa 2 hit den 3 turno i ku e hitnan aki ela hinka 2 kareda. Castillo den 1 turno a dal tambe di hit.
E kampionato ta sigui mañan djadumingu ku 4 wega na Post 6 i 1 wega na Frank Curiel Ballpark na Sta Maria. E promé weganan ta kuminsá 10or di mainta. Na Post 6 ta hunga Republika Dominikana kontra Antigua i na Frank Curiel Ballpark tin e wega entre Bahamas i Boneiru.
Sobra weganan ta tuma lugá na Post 6. Pa 12or San Martin ta hunga kontra US Virgin Islands; 3or Puerto Rico ta topa Liga Pabou i 7or di anochi Cuba i Liga Pariba ta hunga kontra di otro.
