E kampionato nobo den All Star Softball League a ranka sali den wikènt tras di lomba den Frank Curiel Ballpark na Sta Maria. Aktual kampion Nos Goso a sali gana su promé dos enkuentronan. E tim Treasure New Era tambe a gana dos wega.
All Star Softball League ta un liga pa sòfbolistanan veterano. Hopi di nan a hunga den pasado den divishon máksimo di Curaçaose Softball Bond (CSB).
Promé ku e kompetensia nobo den All Star Softball League kuminsá, a entregá e premionan korespondiente na e timnan ganadó di aña pasá i tambe na e softbolistanan ku a sobresalí.
Aktual kampion ta Nos Goso i supkampion ta Treasure New Era. E tim ku a sali di tres tabata The Fighters. Hungadónan ku a sobresalí aña pasá tabata Carine Fluonia, Asila Finies i Murielle de Jongh-Avastia.
Fluonia tabata mihó picher ku un porshentahe di kareda limpi di 0.67 i ela kaba ku 4 triunfo sin derota. Finies a terminá e kompetensia aña pasá komo mihó bateadó (kampion bate) ku un average di .688, produkto di 22 hit den 32 turno. Tambe ela sali Reina Homerun ku 5 homerun. De Jongh-Avastia tabata e ‘Most Valuable Player'(MVP) dje kampionato 2017.
Treasure i The Fighter a topa otro den e promé enkuentro e aña aki den All Star League. E wega a kaba 12-7 na fabor di Treasure. Picher Carine Fluonia a gana su promé kompromiso, miéntras ku Solange Soliano i Minera Maduro tabata mihó bateadónan. Soliano a dal 2 hit den 3 turno (3-2) i Maduro a konektá di 1-1.
Den e di dos wega dje kampionato Nos Gosa a gana ku skor di 10-2 di Lady G. Picher Mirtha Elisabeth a gana e wega, miéntras ku Melisa Rosalina tabata perfekto na bate ku 3 hit den 3 turno (3-3).
E timnan a bolbe topa otro den e sigiuente weganan. Treasure e biaha’ki a gana The Fighter ku skor di 8-4, miéntras Nos Goso a superá Lady G ku skor di 9-5.
E kampionato ta sigui djabièrnè 21 di sèptèmber ku dos wega. The New Warriors ta hunga 8or di anochi kontra di Treasure New Era i pa mitar di 10 tin e enkuentro entre Lady G i The Fighters. E weganan ta tuma lugá den Frank Curiel Ballpark.
