E selekshon di Pabou ayera, djasabra 3 di ougùstùs 2019, a gana e All Star Game kontra di Pariba: 7-1. E wega tabata pèrtá den promé 4 inennan pa despues Pabou skor 3 kareda den tantu su di sinku komo di seis turno pa tuma ventaha amplio.
Despues dje aktividat di Homerun Derby djabièrnè, riba djasabra Federashon Beisbòl Kòrsou (Febeko) a orginisá e tradishonal wega di tur strea. E enkuentro aki tambe a tuma lugá den Stadion Johnny Vrutaal na Rif, Otrobanda.
Selekshon di Pariba tabata formá pa streanan dje sigiuente timnan: Groot Kwartier Stars, Sta Rosa Indians, Wild Cats i Fire Birds. Mènedjer dje tim aki tabata Ardley Jansen. Pabou tabatin hungadónan di Sta Maria Pirates, Royal Scorpions i Marchena Braves, miéntras ku Ramiro Balentina a fungi komo mènedjer.
Pabou a sali skor den su promé turno 1 kareda. Den di sinku inen e seleskhon aki a skor 3 kareda mas i tuma ventaha di 4-0. Ela amplia esaki ku 3 kareda mas den di seis inen. E uniko kareda di Pariba a bin den bòm dje mesun inen aki: 7-1.
Picher Ruendy Carolina a gana e wega. Den 4 inen di trabou ela pèrmití solamente 1 hit sin kareda. Den di sinku inen ela haña relevo di Cerilio Soleana ku den 1,1 inen a pèrmití 1 hit sin kareda. Ramses Jamanika den di seis inen a remplasá Soleana i a pèrmití 1 kareda riba 3 hit. Alexander Rodriguez a drenta den di shete inen i kaba e wega.
Rayshelon Carolina, Sherman Lacrus, Alexander Rodriguez, Raywendley van Gurp i Terrence Goeloe a destaká den kaha di bateo pa e selekshon di Pabou. Carolina, Lacrus, Van Gurp i Rodriguez a bati kada un 1 hit den 3 turno. Goeloe tabata bon pa 2 hit den 4 turno.
Picher Jordan Lucas a sufri e derota pa e selekshon di Pariba. Ela dura solamente un inen i a pèrmití 1 kareda riba 1 hit. Despues di dje seis picher mas a mira akshon riba montíkulo. Terrence Josephina i Hershelon Juliana tabata e mihó batiadónan pa Pariba, kada un ku 1 hit den 1 turno.
E kampionato regular di Febeko ta sigui mañan djaluna ku e wega entre Marchena Braves i Royal Scorpions. E enkuentro aki ta kuminsá mitar di 8 anochi den Stadion Johnny Vrutaal na Rif, Otrobanda.