Warwarú i Watakeli a gana e promé wega di ‘play-off’ den klase A maskulino di Federashon Vòlibòl Kòrsou (Fevoko). E seri a ranka sali ayera, djadumingu 17 di mart 2019, den sala Errol Rooi di Sentro Deportivo Kòrsou (SDK).
E kampionato di vòlibòl ku ta dediká na Dito Ravenstein, aa sigui ayera ku 6 enkuentro. E serinan pre-final a kuminsá den únikamente klase A maskulino, miéntras ku den klase A femenino i divishon superior tabatin weganan balido pa bueltanan preliminar dje kompetensia.
Warwarú ku a tèrminá solido na promé lugá den kampionato regular, a demonstrá ku e tin intenshon serio pa konkistá e titulo kampionil den klase A maskulino. E tim a gana ku skor konvinsente di 2-0 di Titus. E parsialnan tabata 25-16 i 25-17.
Den e otro wega di pre-final Watakeli tampoko tabatin problema ku su kontrinkante. E ekipo a gana ku skor di 2-0 di Stakamahakchi. E parsialnan tabata: 25-15 i 25-13.
Den klase A femenino Shuatanari a logra otro viktoria. E tim a superá Watakeli ku skor di 2-0: 25-6 i 25-15.
Hurricane i Xaverianen a trit e públiko riba un tremendo enkuentro. E wega tabata hopi bringá ku Hurricane bayendo kas ku e triunfo: 2-0, 25-20 i 30-28.
Den divishon superior femenino tabatin dos wega. Hurricane ta derotá Watakeli ku skor di 3-0. Despues di a pèrdè e promé sèt 21-25, Hurricane a gana e sigiuente tres sètnan: 27-25, 25-19 i 25-19.
Mas aleu Shuatanari a triunfá ku relativo fasilidat riba Green Jewels: 3-0. E parsialnan tabata: 25-9, 25-8 i 25-13
E kampionato regular a sigui awe, djaluna 18 di mart, ku dos wega den klase A femenino. Shuatanari ta topa ku Xaverianen i Stakamahakchi ta hunga kontra Hurricane. Tur dos enkuentro ta kuminsá 8or di anochi.