Sport.cw

Sponsored by

Sponsored by

Sponsored by

VESTA a goleá kampion

‘Vriendschap Eendracht Sterken Tegen Alles’ (VESTA), djadumingu 26 di novèmber 2017, a zona un kampanazo den kontinuashon dje kampionato di futbòl. E tim di Buena Vista i besindario a goleá kampion di Kòrsou Centro Dominguito ku 4-0.

Federashon Futbòl di Kòrsou (FFK) a kontinuá den wikènt ku diferente wega válido pa e kampionato den promé divishon, esta Liga MCB. E kompetensia ta keda hungá den Stadion Antoine Maduro na Kintjan.

Den e promé wega awe djadumingu VESTA a derotá Centro Dominguito ku skor di 4-0. Vurgel Bekeer a sobresalí ku 2 gol. Ela skor e promé gol di su ekipo na di 30 minüt di wega, miéntras ku na di 84 minüt tambe e tabata éksitoso. Jerachmeel Cleofa a nota na di 35 minüt i den tempu èkstra Shurwendel Roosje hinka di 4 gol.

Inter Willemstad den e di dos enkuentro awe djadumingu a gana ku skor minimo (1-0) di Jong Colombia. E gol aki a keda anotá pa Rayson Koeiman na di 61 minüt di wega.

Jong Holland a fortifiká su liderato den e kampionato, ganando djasabra su di 3 enkuentro konsekutivo. E Trikolornan a goleá Hubentut Fortuna ku 5-1. Randall Winklaar a habri e skor na di 12 minüt di wega. Hugo Acosta Perez a hasi e wega 2-0 na di 27 minüt.

Despues di sosiegu Charlie Martina a skor e di 3 gol pa Jong Holland. Esaki tabata na di 58 minüt dje wega. Winklaar na di 65 minüt a skor su di dos gol dje enkuentro, miéntras ku Acosta Perez na di 78 minüt tambe a bolbe anotá pa e Trikolornan. Romerson Winklaar den tempu di leshon, esta despues di 90 minüt di wega, a salba honor pa Hubentut Fortuna.

Union Deportivo Bandabou (Undeba) tambe a sali viktorioso djasabra. E tim a gana ku skor di 2-1 di Victory Boys. Chris Isenia na di 14 minüt a pone e ekipo di Bandabou dilanti. Shakir Amerikaan 11 minüt despues a skor e gol di sigurá e viktoria. Sendley Bito via di pinalti na di 42 minüt di wega a skor e úniko gol pa Victory Boys.

Djabièrnè anochi RKSV Scherpenheuvel a gana su di dos enkuentro den e kampionato yòn. E tim di fraternan a gana ku skor minimo (1-0) di Centro Social Deportivo Barber. Atrobe tabata jimbertson Vapor ku a hinka gol pa su ekipo. Esaki tabata via di pinalti na di 77 minüt dje wega.

Jong Holland ta komandá e tabla di posishon ku 9 punto for di 3 wega. E di dos puesto ta okupá pa Skèrpènè ku 7 punto. VESTA, Undeba i Inter Willemstad ta kompartí e di 3 puesto ku 6 punto. Centro Dominguito ta na di 6 puesto ku 4 punto. Centro Barder ku 3 punto ta okupá di 7 puesto riba tabla di posishon. Victory Boys i Jong Colombia ta kompartí e di 8 posishon ku 1 punto, miéntras ku Hubentur Fortuna ta den sotano, esta na di 10 puesto, ku 0 punto.

Translate »