Warwarú ketu bai ta invikto den divishon A maskulino di Federashon Vòlibòl di Kòrsou (Fevoko). E tim a gana ayera, djaluna 7 di yanüari 2019, di Watakeli tambe. E kompetensia den divishon máksimo ta sigui mañan djarason.
Federashon Vòlibòl Kòrsou (Fevoko) despues di un pousa di fin di aña, a sigui ayera djaluna ku e kampionato lokal. Esaki ta dediká na Dito Ravenstein i ta tumando lugá den sala Errol Rooi di Sentro Deportivo Kòrsou (SDK) na Brievengat. Tabatin kuater enkuentro den divishon A.
Den klas maskulino Warwarú a sigui ku su racha viktorioso ganando ku skor di 2-0 di Watakeli. E parsialnan tabata: 25-17 i 25-13. Green Tigers den e otro wega den e divishon aki a superá Xaverianen ku skor di 2-1: 26-24, 8-25 i 15-9.
Den divishon femenino A Stakamahakchi a gana despues di un lucha ténas di Watakeli: 2-1. E parsialnan tabata: 23-25, 26-24 i 15-8. E enkuentro entre Shuatanari i Hurricane tambe a bai tres sèt ku Shuatanari ganando 2-1: 25-27, 26-24 i 15-10.
E kompetensia ta kontinuá mañan djarason 9 di yanüari ku dos wega den divishon máksimo. Den kategoria femenino Stakamahakchi ta topa Green Jewels i den sekshon maskulino Watakeli ta sali kontra di Green Tigers.
