Watakeli ayera a gana su promé wega den e kampionato nobo di vòlibòl den maskulino superior. E kampion di Kòrsou ayera, djadumingu 4 di novèmber 2018, a superá Titus ku e temporada aki ta debutá den e divishon máksimo despues di a promové di Klase A.

Federashon Vòlibòl di Kòrsou (Fevoko) ta organisá e kampionato lokal den sala Errol Rooi di Sentro Deportivo Kòrsou (SDK) na Brievengat. E kompetensia ta dediká e aña aki na Dito Ravenstein.

E timnan ku ta kompetí e aña aki den divishon femenino superior ta: Stakamahakchi, Shuatanari, Hurricane, Watakeli i Green Jewels. Den maskulino superior esakinan ta: Watakeli, Xaverianen, Stakamahakchi, Green Tigers i Titus.

Den klase A femenino e sigiuente ekiponan ta kompetí: Shuatanari, Stakamahakchi, Watakeli i Hurricane. E timnan ku ta mira akshon den klase A maskulino ta: Watakeli, Green Tigers, Xaverianen, Stakamahakchi, Titus i Warwaru. Porsierto ku e último ekipo aki ta kompetí atrobe despues di dos aña di ousensia.

E kampionato nobo a kuminsá ayera djadumingu despues dje seremonia ofisial. Solamente un wega tabatin den divishon maskulino superior. Aktaul kampion Watakeli a gana ku skor di 3-0 di Titus. E parsialnan tabata: 25-17, 25-15 i 25-17.

Fotonan: Jacinto de Jesus